Gunnar Þorbergur

Gleðileg Jól

2007-12-25T12:18:00.000Z

Allir saman.

Lítið

2007-12-16T20:17:00.000Z

Vil byrja á því að þakka fyrir afmæliskveðjurnar alveg sama í hvernig formi þær bárust. Boston var fín. Vorum fullstutt svo ég geti gert greinargóða lýsingu á borginni en ég er byrjaður að vita hvar helstu búðirnar eru.

Annars er búið að vera mjög rólegt. Er búinn að vera á fullu að vinna upp á Mánabrekku. Krakkarnir að komast í jólaskap og það er byrjað að smita frá sér.

Ég er samt eitthvað týndur, kann ekki að hafa svona mikin frítíma í Desember. Svo ég byrjaði að hlaupa og lyfta á fullu aftur.

Lítið að segja að þessu sinni. Seinna.

7. desember

2007-12-07T11:07:00.000Z

Afmælisdagur móður minnar. Rétt að óska henni til hamingju með daginn.

Prófdagur hjá mér. Próf í Heimspekilegum forspjallsvísindum bíður úrlausnar eftir um það bil tvo klukkutúma. Var að rifja það upp við sjálfan mig að það er komið eitt og hálft ár síðan ég fór síðast í lokapróf. Hef síðan þá skilað endalausum ritgerðum. Af þeim sökum er ég spenntari fyrir prófinu en oft áður.

Eftir prófið flýg ég svo út til Boston í helgarferð með móður minni og föður. Þar mun ég eyða afmælisdeginum mínum í góðu yfirlæti og flýg svo heim á sunnudaginn.

Mikið að gera í dag.

Afreksmaður?

2007-12-05T14:31:00.000Z

Það er hægt að komast að undarlegustu hlutum um sjálfan sig með því einu að google-a sig.

Rakst á þetta áðan:

Þið getið smellt á myndina svo hún stækki.

Svo þið haldið ekki að ég sé að skálda þetta er hérna að finna tengil.

Ég vissi aldrei að ég hafði verið á einhverri afrekaskrá FRÍ árið 2006, hvað þá að ég hefði verið þar efstur.

En ég hef einstaklega gaman að því svona eftir á.

(Mikil blogg virkni mín helst í hendur við það að ég á að vera læra.)

Miðvikudagar

2007-12-05T14:10:00.000Z

Eru einfaldlega bestu dagar vikurnar. Nú spyrð þú, lesandi góður, afhverju er það?

Það er einfaldlega vegna þess að þá hittist frábær vinahópur og iðkar hina göfugu íþrótt fótbolta. Hópurinn saman stendur af gamla Gróttu-genginu auk nokkra valinkunnra gestaleikmanna.

Við erum kannski aðeins stærri, feitari, klunnalegri og úthaldsminni en við skemmtum okkur alveg jafn vel og þegar við vorum pollar.

Vörnin verður á svæðinu.

Sóknin á harma að hefna frá síðasta leik varnar á móti sókn, svo þeim veitir ekki af því að mæta allir í kvöld.

Hvað er að ske?

2007-12-04T16:36:00.000Z

Ætlunin var að reyna að bíða með það að koma með færslu hingað í mánuð. En ég er bara of duglegur að blogga til þess.

Aðalástæðan fyrir letinni hefur verið ritgerðarsmíði, en ég á oft erfitt með það að koma með færslu þegar ég að er að skrifa á fullu. Ritgerðin mín fjallaði um þjóðaratkvæðagreiðslur og var fyrir kúrsinn lýðræði á 20. öld. Þessi ritgerð var í stað prófs og þess vegna var vandað til verksins.

Við vinnu þessara ritgerðar komst ég að því að stjórnarskráin er með gallaðari plöggum sem þessi þjóð á og að engin vill vinna bót á því. Þá síst stjórnmálamenn sem eru í kjöraðstæðu til að breyta henni.

Þar sem ritgerðin í þessum kúrs gilti sem próf þá er einungis eitt próf á dagskránni. Það er á afmælisdegi móður minnar þann 7. desember næst komandi, en prófið er úr gleði áfanganum Heimspekileg forspjallsvísindi. Ég er ekki í prófum á afmælisdaginn minn sem er sá 8. desember og get ég ekki nefnt ykkur það ár sem það gerðist síðast. Það verður erfitt að díla við það enda er ég gríðarlega vanafastur maður.

Meira var það ekki.

Leiksigur

2007-11-11T13:25:00.001Z

Vinnustaðurinn minn, Leikskólinn Mánabrekka, fagnaði 11 ára afmæli um daginn.

Að því tilefni var boðið upp á húllumhæ. Þar á meðal var ákveðið að setja upp á leikritið Geiturnar þrjár, en bókina þekkja flestir til. Ráðið var í hlutverkin á starfsmannafundi sem ég var ekki viðstaddur. Endaði það auðvita með því að ég var látinn í hlutverk. Féll mér í skaut hlutverk Kiðakiða, yngstu geitarinnar, mér til mikillar ánægju.

En á sýningu kom í ljós að ég hef falda hæfileika. Ég er bara ágætis leikari og óhætt er að kalla framgöngu mína ekkert annað en leiksigur. Hef þó ekki hug á því að gera þetta að starfsframa en það er gott að vita að maður býr að þessu ef sagnfræðin er ekkert að virka.

Búningurinn var ekki af verri toganum því það kom í ljós að ef þú snýrð við 66° norður kraftgalla þá ertu kominn með þennan fínan geitarbúning.

Öllu gríni sleppt þá var þetta bara nokkuð skemmtilegt. Skemmtilegast finnst mér þegar börn á öðrum deildum sem ég þekki lítið ganga upp að mér af fyrra bragði og tilkynna mér það að ég hafi leikið Kiðakið.

Læt fylgja með mynd sem sannar sigurinn. Þarna er ég að ganga yfir brúnna, búinn að sannfæra tröllið um að éta næstu geit og tilbúin að fara og bíta gras.

Áskorun

2007-11-10T19:09:00.000Z

Hetjan hann faðir minn hljóp NYC Marathon síðasta sunnudag. Lauk hann herlegheitunum á tímanum 4:03:20 sem þykir góður tími.

Í tilefni þess skoraði hann á mig að hlaupa með sér Kaupmannahafnarmaraþon þann 18. maí næstkomandi. Gekk hann það langt að skrá mig í hlaupið án minnar vitneskju.

Ég er ekki enn búinn að ákveða hvort ég eigi að taka þetta verkefni af mér. Þetta kitlar óneitanlega mikið.

Verst finnst mér að undirbúningstímabilið fyrir þetta hlaup er yfir köldustu vetrarmánuði hérna heima.

Ætla íhuga þetta aðeins, læt ykkur vita í lok janúar.

Eigið góða helgi.

Vetur konungur

2007-10-30T14:43:00.001Z

Ég er byrjaður að þurfa nota ullarsokka, nefið mitt er orðið jafn rautt jólakúlu að lit og það kemur móða á gleraugun mín þegar ég kem inn úr kuldanum, svo ég minnist nú ekki á snjóinn...

...það er kominn vetur.

Í regnboga tímans

2007-10-29T15:49:00.000Z

Núna síðastliðinn föstudag, nánar tiltekið 26. október, komu út tveir hlutir sem ég hef beðið eftir með nokkurri eftirvæntingu.

Fyrst ber að nefna Leopard nýjasta stýrikerfið í Mac Os X seríunni. En biðin eftir þessari uppfærslu hefur verið óvanalega löng. Stýrikerfið hefur verið að fá ágætis dóma þar sem ég hef lesið en því miður er ég ekki búinn að ná mér í það sjálfur. En það gerist eflaust von bráðar. Á meðan bíð ég eins og lítið barn eftir jólunum, því að fá nýtt stýrikerfi frá Apple er eins og fá nýja tölvu.

Hinn er PES 2008. Leikurinn lítur mjög vel út, en hefur verið að fá slæma dóma vegna hikst þegar hann spilast. Jafnvel þegar hann er spilaður PS3 sem tækjabúnaðslega á að vera kraftmest tölvan á markaðinum í dag. En nördanir í Konami eru á fullu að búa til plástur sem vonandi bætir þetta. Það er vonandi að þeir ná að laga þetta því það er varla hægt að byrja að bíða eftir nýjum PES í heilt ár þegar þessi er nýkominn út. Gæti þetta verið fyrst klikk PES-manna en hingað til? Ég hef hingað til verið mjög ánægður með alla PES leikina og fundist þeir mun skemmtilegri í spilun en FIFA, sem er þeirra helsti keppinautur. Það er ekkert annað í stöðunni en að bíða og sjá en ég neita því ekki að ég varð fyrir vonbrigðum.

Þessi færsla átti alltaf að koma út á föstudaginn samtímis útgáfu þessa hluta en ég lagðist í rúmið og eyddi helginni þar glápandi á enska boltann. Er þó staðinn úr rekkju og er aftur orðinn fílhraustur.

Fyrst ég er deila skoðun mínum á afþreyingahlutum þá vil ég endilega mæla með In Rainbows, nýjustu afurð Radiohead (varla hægt að kalla þetta disk þar sem það ekki búið að gefa diskinn út enn). Radiohead hefur eitthvað tak á mér því ég fíla allt sem þeir gefa út og þessi diskur er enginn undantekning. Afurðinn er mjög þægileg í hlustun og skemmtileg.

Svo vil ég líka mæla með Tímunum okkar, fyrsta disk Sprengjuhallarinnar. Þessi diskur er búinn að koma mér verulega á óvart. Langt síðan að eins góðir textar hafa komið út á gamla ylhýra. Ég hef líka alltaf gaman af diskum sem eru með þema, líkt og til dæmis Sgt. Peppers með Bítlunum og Graduation með Kanye West, finnst það oftast gera diskana mun hlustanlegri. Sem mér finnst mjög mikilvægt enda er ég mun meira fyrir að hlusta diska í heild heldur en playlista. Á Tímunum okkar er tíminn yrkisefnið og það er leyst mjög vel, get nánast fullyrt að mánuðirnir og árstíðarnar hafa aldrei verið þuldir jafn oft upp á íslenskum disk áður og finnst mér það vel gert.

Vonandi hjálpar þetta ykkur eitthvað. Meira var það ekki.

Topp 5

2007-10-24T18:55:00.001Z

Við það að vera leikskólaleiðbeinandi:

1. Allir krakkarnir, eins ólík og þau eru
2. Ótakmörkuð faðmlög
3. Fjöruferðir
4. Gleðin við það að finna að það sem maður er að gera skiptir máli
5. Samkomur í salnum

Verst:

Launin
Hádegismaturinn

Ég í fjöruferð

Stór og lítill

2007-10-21T22:19:00.001Z

Lítið að gerast, lítið að spá og því lítið skrifað.

Er samt stórhuga.

Landslið Kataloníu

2007-10-09T18:31:00.000Z

Sá þessa grein inná Vísi.is og byrjaði að velta fyrir mér hugsanlegu landsliði Kataloníu. Hef lengi haft áhuga á svæðinu og knattspyrnuliðinum þar, þó aðallega Barcelona. Vegna gæða miðjumanna ákvað ég að láta liðið spila 4-3-3. Ekki slæmur mannskapur miðað við lítið svæði landfræðilega séð.

Reina
Oleguer - Puyol - Pique - Gabri
Iniesta - Xavi - Fabregas
Ivan de la Pena - Bojan Krkic - Luis Garcia

Er ég að gleyma einhverjum eða er til sterkara lið? Endilega deilið ykkar skoðun með mér.

Einn af stelpunum

2007-10-05T15:22:00.000Z

Mér hefur verið tíðrætt mín nýja vinnan á blogginu síðkastið. Verður nú engin breyting á. Ætla þó aðeins að tækla málið frá nýrri hlið nú.

Það vita allir að meginþorri leikskólakennara saman stendur af kvennmönnum. En hingað til hef ég aðallega unnið mest megnis á vinnustöðum með óhefluðum karlmönnum. Svo þetta er ný reynsla fyrir mig. Umræðurnar á kaffistofunni eru það sem ég á í mestu erfileikum með að venjast. En ég reyni að sína lit og taka þátt eins mikið og ég get. En fjandinn hafi það, þegar umræðuefnin eru óléttur og appelsínuhúð þá er þetta einum of langt gengið. Þá fer ég bara frekar aftur að vinna.

Lýsi hér með eftir strákum til að vinna á leikskólum landsins. Ekki vegna þess krakkarnir þarfnast þeirra heldur vegna þess að ég geri það.

Haustfagnaður Mánabrekku í kvöld. Ég og um 20 konur. Sjáum hvort ég verði ekki búinn að stilla tíðahringinn minn eftir öllum hinum konunum í vinnunni eftir kveldið.

Myndir frá sumrinu

2007-10-04T20:04:00.000Z

Þar sem sumarið er á enda runnið og skammdegið byrjað að þokast yfir mann er vel við hæfi að birta nokkra góðar myndir frá sumrinu til að ylja sér.

Fyrst kemur myndsyrpa með mér og Bjarma frá okkar ýmsu ævintýrum í sumar. Ódýr sólgleraugu eru þemað.

Á Hróaskeldu

Í bústaðinum hennar Hildar

Þjóðhátíð

Alabama

Og svo héðan og þaðan.

Þingvellir

Való 2000 Reunion

Gróttu 84 Reunion

Alabama

Almenn uppfærsla

2007-10-03T20:17:00.000Z

Það sem ég var í svona löngu blogghléi er þá ekki rétt að ég uppfæri ykkur, lesendur mína, um hvað sé í gangi hjá mér núna. Er á fullu að klára sagnfræðina. Er þó einungis í tveim kúrsum, Lýðræði á 20. öld og Heimspekilegum forspjallsvísindum. Er svo að fara á stað með BA ritgerðina mína, fer og funda um hana í næstu viku með prófessurunum mínum. Ætla ég deili svo ekki ritgerðarefninu og vinnslu á henni vel með ykkur, svo vel að þið hættið að nenna að lesa síðuna.

Vinnan gengur vel og líkar mér hún vel. Það er mjög gaman að vinna með krökkum og eitt er víst, manni leiðist aldrei. Fór á námskeið ætlaði nýjum kennurum (komst einmitt þar að því að ég má kalla mig leikskólakennara) þar sem þriggja ára háskólanámi var reynt að setja inn í hausinn á okkur á 3 tímum. Kom út og mundi eina aðferð. Hin svokallaða já-aðferð. Hún felur í sér að hægt er að segja já við 99% allra spurninga sem maður fær eins lengi og maður skilyrðir vel svarið. Ætla mér að reyna að nýta þessa aðferð í daglegu lífi framvegis.

Er síðan hreyfa mig þessa dagana. Keypti kort í Þrekhúsinu og er þar að hamast á lóðunum. Málið er bara að mér finnst svo leiðinlegt að lyfta, enda oftast með því að fresta því að fara lyfta og fer frekar út að hlaupa eða hjóla.

Já, þetta er eiginlega þrenningin hjá mér þessa dagana. Læra, vinna og hreyfa mig.

Ekki meira að sinni. Leiter

Sweet home Alabama

2007-10-02T11:20:00.000Z

Það þurfti ekkert að pína mig til að titla ferðasöguna með þessu nafni. Enda eina nafnið sem kemur til greina þegar ferðast er til Alabama.

Svo ég haldi áfram eða réttara sagt byrji. Ég og Bjarmi ákváðum fyrir hartnær 8 mánuðum síðar að heimsækja Tinnu til Alabama þetta haust og eins og sannir heiðursmenn stóðum við okkur skuldbindingu.

Við flugum út föstudaginn 14 september og komum heim aðfaranótt sunnudagsins 23. Flugið út var langt eða um 14 tíma ferðalag. Í seinna tengifluginu frá Boston-Atlanta var líka smá töf sökum þrumuskýa. Ég veit ekki með ykkur en ég er ekkert alltof graður í að sjá eldingar í flugvélagluggunum þegar ég staddur í þeim.

En þetta ferðalag var allt þess virði þegar við sáum hana elsku Tinnu okkar. Við fengum höfðinglegar móttökur og allan tíman var farið með okkur eins kónga. Ég þakka hér með Tinnu og sambýling hennar, henni Önnu Beggu, fyrir það. Kynntumst við líka David, kærasta Tinnu, sem reyndist vera þessi frábæri gaur sem tók okkur mjög vel og sá til þess að okkur leiddist aldrei.

Við fórum á leik í amerískum háskólafótbolta í Auburn, sem er borg í Alabama og í henni er einmitt þessi skóli, sem er samkvæmt mínum heimildum næsti stærsti háskóli fylkisins. Gríðarlegur áhugi er á háskólafótboltanum þarna úti og mættu til að mynda u.þ.b. 80.000 manns á þennan leik og mikil stemming. Til marks um áhugan söng Taylor Hicks, sigurvegari American Idol, í hálfleiknum undir öruggs undirspil lúðrasveit skólans. Sigurinn var þó ekki heimamanna að þessum sinni heldur fór Missipi State með sigur hólmi í þó ágætlega spennandi leik.

Tinna keppti einn leik á meðan dvöl okkar stóð. Ég og Bjarmi sátum á fremst bekk og sáum AUM leggja örugglega gestaliðið 5-2. Rétt er að minnast að Anna Begga skoraði tvö mörk í þessum leik og Tinna sá um vörnina að stakri prýði.

Þess á milli versluðum við, fórum í sólbað eða eyddum stundum okkar í almennt letilíf. Við versluðum í Montgomery sem er fjölmennasta borg fylkisins og fórum yfir til Georgia og heimsóttum Atlanta, þar var enn meira verslað og kíkt á Ólympíugarðinn sem var reistur af tilefni Ólympíuleikana 1996 sem fóru fram í borginni.

Ég fór í annað skiptið á ævinni í golf og batnaði leikur minn talsvert þegar leið á brautina. Geng þó ekki það langt að segja að ég sé góður.

Kíktum út á lífið. Fórum á rosalegan bandarískan háskólaskemmtistað. Staðurinn var nokkuð fyndinn í mínum augum. Til dæmis dönsuðu allir sama dansinn, þ.e., stelpurnar nudduðu rassinum upp að klofi dansfélaga síns sem iðulega svaraði í þeirri mynd að þykjast slá hann. Þrátt fyrir að kalla mig liðtækan á dansgólfinu þá ákvað ég að sleppa því að dansa að þessu sinni.

Við kvöddumst síðan með tárum á snemma á sunnudagsmorgninu. Millilentum aftur í Bostom og áttum nú nokkra tíma aflögu svo við fórum niður í bæ. Boston reyndist mjög falleg og sérlega hrein borg miðað við okkar fyrri áfangastaði í þessari ferð. Væri mjög gaman að fara aftur þangað og geta eytt þar meiri tíma.

Ég held að þetta telji upp megin atburðina. Er þó eflaust að gleyma einhverju. Þetta var samt æðisleg ferð og þakka ég enn og aftur Tinnu fyrir mig. Ég setti nokkrar myndir úr ferðinni hingað hingað.

Uppfærsla

2007-10-02T02:03:00.001Z

Ákvað að uppfæra aðeins síðuna. Var búinn að fá leið á gamla útlitinu og þó sérstaklega Danebro sem blasti alltaf við.

Commenta kerfið fór upp og niður að þessum sökum. Sjáum hvort Haloscan commentakerfið detti inn eða hvort ég taki hreinilega ekki bara upp kerfið sem Blogger bíður upp, það hefur nefnilega batnað mikið að mínum dómi.

Nýir tímar - nokkurn veginn nýtt blogg

2007-10-01T22:21:00.000Z

Eftir góða pásu frá bloggi ætla ég að reyna að koma mér aftur í gírinn. Kannski er þetta tilraun sem ekki mun ganga, það verður tíminn einn að skera úr.

Til þess að koma mér í gang lofa ég nýrri færslu dagleg næstu vikuna (þessi er ekki tekinn með). Ég held að það sé eina leiðin svo ég komi mér af stað. Eina sem er að veði í þessu loforði er mitt orð.

Endilega fylgist með.

Kveðja,

Gunnar Þorbergur

Þetta mánaðarlega

2007-08-19T16:13:00.000Z

Nei, ég er ekki byrjaður á túr, ég er bara að blogga. Oddur tók það nú að sér að drepa bloggið mitt um daginn en það er ekki dautt úr öllum æðum enn. Smá vanræksla og maður er bara drepinn, það er nú einu sinni sumar. Ótrúlegt að maður sé ekki hangandi fyrir framan tölvuna bloggandi 24x7. En nóg um það.

Eyjar voru æðislegar. Kom mér mikið á óvart hversu gaman var. Hef yfirleitt hangið heima um Verslunarmannarhelgar og látið fleygar setningar eins og "fínt að vera heima á meðan allir hálfvitarnir fara úr bænum". Núna var ég sem sagt einn af hálfvitunum í Eyjum. Náði að gera allt það helsta sem á að gera í Eyjum eins og að fá mér lunda, fara í fjallgöngu og hlusta Árna Jóhnsen í brekkunni. Mannskapurinn var líka ekki að verri endanum Orri og Gaggi voru mér yfirleitt við hlið, handboltahetjurnar í Gróttu sem við deildum húsi með fá hæstu einkunn og svo koma festival-bróðir minn hann Bjarmi auðvita, Tinna kom á sunnudeginu og kenndi mér rétta Eyja hegðun enda stelpan reynslumikil Þjóðhátíðarfari, síðast en ekki síst vil ég minnast á frábæra innkomu Röggu frænku á sunndeginum. Kastaði inn myndum frá Eyjum á myndasíðuna mína, það má nálgast þær hér. Var samt frekar latur á kubbnum svo afraksturinn er ekkert til að hrópa húrra fyrir.

Ég er búinn að ráða mig í vinnu í vetur og verð leiðbeinandi á leikskólanum Mánabrekku sem er hér í næsta nágrenni við mig. Verð þar á bankastjóralaunum líkt og aðrir leikskólakennarar eru á nú til dags.

Hljóp hálft maraþon í Reykjarvíkurmaraþoninu í gær. Fór kílómetrana 21 á 1:28:12. Er gríðarlega ánægður með þennan tíma enda var markmiðið að vera undir 1:30. Samkvæmt marathon.is var ég númer 39 af 1142 þáttakendum. Eins og les má af skrifum mínum er ég nett montinn af sjálfum mér. Dagrún systir á líka mikið í þessum tíma en hún hjólaði með mér, studdi mig og gaf mér einhver ógeðsleg prótein boost sem skiluðu sínu.

Nú fer að styttast í annan endann á þessu sumri og líður að skólasetningu. Ég byrja 3. sept í sagnfræðinni og stefni að því að útskrifast næsta júní. Ef Guð lofar og ég nenni. Þetta kemur bara allt saman í ljós.

Farfuglarnir farnir að týnast út. Robbi farinn til Sviss, Tinna til Bama og næst fer Hildur á föstudaginn. Verður tómlegra á klakanum án þeirra. Í staðinn fær maður ástæðu til að flýja til útlanda í heimsókn.

Þetta var það helsta. Verð eflaust svipað virkur næstu 2 vikurnar en tek mér taki þegar skólinn byrjar. Síðan er vilji fyrir því að hressa aðeins upp á útlit síðunnar, kíki á það síðar. Leiter.

Stikkorð

2007-08-03T00:17:00.000Z

Búið:

Heimkoma - bústaður - Apavatn - 4.FF - vinna - Eimskip - Gámar - Fjölskylda - vinir - vandamenn - bærinn - reunion - dansa - útborgað - skuldir - spilakvöld - Bæjarins bestu - Subway - Yfirvinna - Áfengi - Neshringurinn - Hlaupa.

Verðandi:

Eyjar - Þjóðhátíð - Herjólfur - rigning - rok.

Heimför

2007-07-12T11:24:00.001Z

Ég kem heim í kvöld.

Kem með kveðjupistil til heiðurs C-104 eftir helgi.

Leiter.

Uppgjör við Skelduna

2007-07-09T07:26:00.000Z

Hróaskelda 2007 er búin. Frábær hátíð sem verður mér lengi minnum höfð.

En er ekki best að byrja á byrjuninni. Fór á sunnudaginn 1. júlí og tjaldaði með Ingva, fór svo heim og beið með eftirvæntingu eftir miðvikudeginum. Á þeim tíma höfðu gestirnir týnst til mín koll af kolli. Á miðvikudags eftirmiðdaginn lögðum svo ég, Oddur, Bjarmi og Orri af stað. Mætum við frekar undarlegar aðstæður. Svæðið hafði gjörbreyst svo mikið frá sunnudeginum til miðvikudags að ég varla þekkti staðinn aftur. Allt var í drullu. Komum okkur fyrir og tjilluðum í campinu.

4 aðfaranótt fimmtudags rumska ég svo við að það er byrjað að rigna. Þegar ég vakna daginn eftir er enn að rigna. Dagurinn leið og enn rigndi. Flúðum inn í tjald því var hvergi annarsstaðar var hægt að vera án þess að vera renn blautur. Kíkti rétt á Arcade Fire og Volbeat enn aðalnúmerin það kvöld voru The Killers og Björk og sá ég þá alla. Alla tónleikana rigndi. Eftir tónleikana ákváðum að flýja heim í C-104 enda tjaldið byrjað að leka og varla þurran blett að finna á manni. Endaði svo með því að ég og Orri komum heim 5 um nóttina eftir heimferð sem mun seint gleymast. Skildumst við hópinn og lentum í rosalegum múgæsingi við að komast í lestina. Gott ævintýri það. Það styttist loks upp í kringum 1 um nóttina eftir 20 tíma af grenjandi rigningu. Þennan dag rigndi 40mm en árið 1997, sem var talin blautasta hátíðin hingað til, rigndi 43 mm alla hátíðina. Eftir þennan rosalega rigningardag rigndi ekkert að ráði þó nóg til að brjóta metið.

Leyfðum okkur að sofa út á föstdaginn. Andinn var frekar brotinn en ekki annað í stöðunni en að drífa okkur aftur á svæðið. Ástandið var þá orðið rosa slæmt á svæðinu og drulla allsstaðar. Svæðið leit út eins og flóttamannabúðir sem maður sér einungis í fréttunum. Um kvöldið stigu Beastie Boys á stokk, Mika cancel-aði því miður en það þýddi bara að við náðum öllum Peter, Bjorn og John tónleikunum. Inn á milli var svo tjekkað á Queens of the Stone Age og Nephew. Sváfum á svæðinu um kvöldið.

Laugardagurinn fór í almenn róleigheit fyrir tónleika kvöldsins. Flaming Lips byrjuðu kveldið. Eyddi mest af þeim tónleikunum í biðröðina fyrir The Who tónleikanna. Vorum alveg fremst á þeim. Red Hot Chili Peppers slúttuðu svo kvöldinu. Orri, Beta og María fóru heim í C-104 en ég og Bjarmi sváfum á svæðinu.

Var ekkert rosa spenntur fyrir dagskránni á sunnudaginn svo ég og Bjarmi sátum bara og kláruðum bjórinn. Fórum svo snemma heim af Muse til þess að lenda ekki í einhverju bulli á leiðinni heim.

Af tónleikunum sem ég sá stóðu The Who upp úr. Hljómsveitin er einn af uppáhaldshljómsveitum pabba og hefur verið í langan tíma svo ég hef hlustað á þá frekar lengi og það var gamall draumur að sjá þá live. Þeir voru rosa þéttir og höfðum mjög gaman af því að vera spila á hátíðinni og það smitaðist frá sér. Björk og The Killers voru frábærir en veðrið hafði smá áhrif á þau enda varla ekki annað hægt. Frábært að sjá Björk live, hafði ekki gert það áður og það er upplifun að sjá hana á tónleikum. Peter, Bjorn og John voru líka góðir. Voru á litlu sviði sem var góð tilbreyting og góður andi var á meðal áhorfenda. Beastie Boys voru flottir og skiluðu sínu vel. Red Hot Chilli Peppers var eina stór hljómsveitin sem brást en þeir voru með frekar undarlegt lagaval og það var eins og söngvarinn hafði eitthvað betra að gera en að vera á sviðinu.

Rigning hafði nokkur áhrif á festival-ið í heild sinni. Metúrkoma á til að gera það. Eftir að maður gallaði sig um morgunninn nennti maður varla úr honum allan daginn enda þvílíkt mál að gera það án þess að drulla út tjaldið. Það varð mun erfiðara að færast um svæðið og maður var lengi að öllu. Sá því mun minna af litlum hljómsveitunum en ég ætlaði mér og kenni ég veðriðinu og aðstæðum um það.

En eins og ég sagði í upphafsorðum þá fannst mér þetta frábært festival og rigningin komst ekki nálægt því að skemma hana. Gæti vel hugsað mér að koma aftur og upplifa hátíðina þurra og sjá muninn. Vil að lokum þakka öllu samfarafólki mínu á hátíðinni fyrir frábæran félagsskap og geggjað festival. Svo ullarpeysum og stígvélum fyrir að vera til, án þeirra hefði Skeldan verið mun gleðiminni.

Ótrúlegt en satt var ég nokkuð duglegur á kubbnum hátíðina. Sjáið árangurinn hér.

Leiter

Roskilde 2007

2007-07-04T08:27:00.000Z

Almenn leti hefur verið til þess að ég hef ekkert ritað hér í marga daga. Eftir að skólinn kláraðist er ég búinn að vera að taka því full rólega og varla nennt neinu. En þeir dagar eru nú búnir og sanna ég það hér með góðri færslu.

Fyrir tveimur helgum komum mamma og pabbi í heimsókn eins og greint var frá hér síðast. Alltaf gaman að sjá þau og skemmtum við okkur vel á þessum stutta tíma sem þau voru hér. Fóru meðal annars út að borða á Reef and beef sem er vinsæl ástralskur veitingastaður hér í borg. Fékk mér kengúru sem smakkaðist mjög vel.

Síðan er ég búinn að vera að ganga frá lausum endum í sambandi við heimför. Mörgu að hyggja fyrir þetta allt saman.

Á mánudaginn komu svo Davíð, Gerður, Ívar og Enric í tveggja daga heimsókn á Øresundskollegið. Ég og Oddur skiptum gestunum bróðurlega á milli okkar. Aldrei lognmolla í kringum þetta fólk og að venju var vel setið á Kollegibarnum margfræga. Þau fara svo í dag.

Ég fór á sunnundaginn með Ingva félaga úr I.F. Guðrúnu og nágranna til Hróaskeldu. Fékk bandið mitt og er búinn að veifa því um stoltur síðan. Við tveir tjölduðum 7 tjöldum og mynduðum þetta huggulega camp þar sem við eigum eftir að eiga heima í út hátíðina. Hróaskeldufélagarnir byrjuðu svo að detta inn hver á fætur öðrum. Bjarmi mætti á mánudaginn og Orri á þriðjudaginn. Spennan byrjuð að magnast í hópnum. Planið er að fara í dag á hátíðina. Í kvöld mætir svo Beta og þá er allt mitt samferðafólk á þessari hátíð mætt.

Ingvi félagi er klár strákur. Hann á svona síma sem tekur myndir og þeim er hægt að upphlaða svo strax á veraldarvefinn. Hann ætlar því að halda út lítilli myndasíðu á meðan hátíðinni stendur. Þessi tækni, ótrúleg. Á síðunni verða eflaust einhverjar myndir af okkur og líka af ástandinu á hátíðinni svo ég ætla gefa hér linka á þessa síðu fyrir áhugasama. rafninn-roskilde-2007.blogspot.com

Meira var það ekki í bili. Farinn á Hróaskeldu. Leiter

Dekraður og stórafmæli

2007-06-22T08:12:00.000Z

Aðeins ofdekrað yngsta barn eins og ég hefði getað dregið foreldra mína frá fínu veðri á Íslandi yfir í rigningaskúr í Danmörku á 25 ára afmælisdegi stóru systur sinnar til þess eins að taka heim fyrir hann (mig) dót. Og ég sem hef alltaf haldið því fram að ég sé ekkert það dekraður. Ég er betur byrjaður að skilja afstöðu systur minnar á þessu máli.

Ég vil nýta mér bloggið mitt til þess að óska þessari sömu systur minni til hamingju með 25 ára stórafmælið. Mér finnst voða leiðinlegt að geta ekki séð hana í dag og gefið henni koss á kinnina og notið félagsskaps hennar. Líkt og alvöru eiginhagsmuna yngri bróðir er ég ekki búinn að senda til hennar afmælisgjöf svo hlý orð mín verða að duga í bili. Svo rétt er að vanda til verks.

Fyrir utan mömmu er Fríða sú manneskja sem ég hef þekkt hvað lengst og get ég ekki ímyndað mér líf mitt án hennar. Alla mína tíð hefur hún verndað mig og hugsað vel um mig. Án nokkurs vafa verið mun betri við litla bróður sinn en bróður hennar við hana. Oft illa launað starf að vera eldra systkyni. Ég vona þó að ég hafi batnað eitthvað með árunum og ef svo er þá á hún stóran þátt í því. Ég hef alla tíð litið mikið upp til hennar og hún hefur haft mikil áhrif á mig sem persónu, meira en ég hef oft þorað að viðurkenna og eflaust mun meira en hún gerir sér grein fyrir. Betri systur getur bróðir ekki getað eignast. Megir þú eiga frábæran afmælisdag í London elsku besta systir mín.

Með kærri afmæliskveðju. Litli bróðir.

Sumarfrí

2007-06-19T19:24:00.000Z

Skilaði seinni ritgerðinni minni inn í gær. Fyrstur til að viðurkenna að ég get gert aðeins betur en þetta en svona er þetta stundum. Var samt orðinn nógu sáttur með hana í lokin fyrir skil. Þakka systur minn kærlega fyrir alla hjálpina við báðar ritgerðinnar. Svo nú er ég bara kominn í sumarfrí í orðsins fyllstu merkingu. Ekkert planað fyrir Hróaskeldu nema að skemmta sér og njóta þess að vera í fríi.

Eiríka móðursystur og Dói maðurinn hennar komu til Danmerkur á miðvikudaginn síðasta til þess að fara Genesis tónleika. Með þeim kom dóttir þeirra og frænka mín Esther Elín. Á meðan þau fóru og horfðu á Phil Collins tromma og tralla varð hún eftir hjá mér. Það var mjög gaman að fá hana í heimsókn. Við fórum saman á Guinness World Record safnið á Strikinu og svo auðvita í Tívolí þar sem þessi mynd er tekin af henni með Candy Floss.

Á föstudeginum buðu svo Eiríka og Dói mér Hereford steikhúsið þar sem ég fékk æðislegan mat. Vil þakka þeim öllum kærlega fyrir heimsóknina og fyrir mig.

Hef frá því í mars verið að senda heim dót héðan frá C-104 og er búinn að segja upp leigunni. Nú er bara að fara ganga frá rest, get dúllað mér við það, ég hef nægan tíma allavega. Oriðið óhugnalega stutt í að ég komi heim. Er orðinn verulega spenntur að hitta alla.

Vil nota tækifærið og óska Döggu systir, Pálmari, Evu og öllum hinum sem voru að útskrifast um helgina til hamingju með þann árangur.

Gleði sagnfræðinemans

2007-06-13T09:38:00.000Z

Að finna loks eftir tveggja tíma leit góða skilgreiningu á hugtaki sem hann getur sett í ritgerðina sína. Þessi skilgreining mun taka um það bil tvær línur í 15 blaðsíðna ritgerð.

Lærdómur

2007-06-10T10:45:00.001Z

Ég að læra í dag. Viftan sem er bakvið tölvuna sést ekki en hún er í hæstu stillingu. Ef ég er að tala við ykkur á msn er ég örugglega bara á nærbuxunum einum klæða. Vona að það hræði ykkur ekki frá því að tala við mig, reynið bara að hugsa ekki um það. Mér til varnar er 27 stiga hiti og glampandi sól úti.

Að mæla götuna

2007-06-08T08:31:00.000Z

Hefur verið starfsheiti margra góðra manna (og kvenna) yfir sumartímann. Svo virðist sem ég bættist í þann góða hóp í sumar ef fer sem horfir. Eftir að sammningaviðræður við Eimskip sigldu í strand sit ég sár eftir án starfs í sumar. Ég hélt að ég hefði verið búinn að ná samkomulagi við yfirmann minn í Eimskip en hef greinilega misskilið manninn svona hrikalega.

En ekki örvænta strax. Ég er farinn á fullt í málið og er byrjaður að væla í bænum að gefa mér starf, við sjáum hvernig það fer. Ég er draumur hvers manns sem er að ráða sumarfólk í vinnu. Ég get ekki byrjað að vinna fyrr en 16. júlí, fer til Eyja um Verslunarmannahelgina og þarf að hætta um leið og Háskólinn byrjar. Ég mundi ekki einu sinni ráða sjálfan mig.

Annars ætti bara að reka Hildi af leikskólanum á Nesinu og gefa mér starfið. Ekki viljum að krakkarnir alist upp haldandi að 101 sé staðurinn og það sé í lagi að vera artý fartý. Ó nei, frekar kjósum við Seltirningar áframhaldandi dugnaðar viðskiptafræðinga sem stefna að heimsyfirráðum. Nei, fyrirgefðu Hildur, ég vil ekkert að þú missir starfið þitt, missti mig bara smá í biturleikanum.

Annars var ég að segja upp leigunni af C-104 sem er ágætis spark í rassinn um að ég sé á leiðinni heim.

Já, ég er að blogga því ég á að vera læra.

Leiter.

Að sitja sveittur við lærdóm

2007-06-06T13:31:00.001Z

Hugtakið hefur öðlast nýja vídd í þessum hita.

Bless Lars, Hildur, Rut, Pétur, Dagrún og Rósa & Co

2007-06-04T13:46:00.000Z

Mikil vanræksla hefur verið á þessu bloggi undanfarið. Það stafar ekki (einungis) af leti. Ég er nefnilega ekki að ljúga þegar ég segi að ég er búinn að vera frekar upptekinn síðastliðnu viku.

Þetta byrjaði allt með heimsókn Hildar vinkonu á fimmtudeginum 24. maí. Hún kom vegna viðtals við skóla sem hún sótti um. Hún fékk að gista hjá mér og tókum við því rólega og skemmtum okkur vel. Föttuðum það að við nöldrum eiginlega bara þegar aðrir eru í kringum okkur en erum ljúf eins kettlingur þegar við erum tvö að hanga. Hildur tók nokkrar myndir og vísa ég ykkur í þær hér.

Á föstudeginum mætti svo frekar óvænt hún Rósa systir mín með strákana sína tvo. Þau fengu íbúðina mína og ég og Hildur fengum afnot að íbúðinni hans Odds, sem var einmitt í Bretlandi þessa helgi. Ég og Hildur fórum svo og hittum Rut bekkjarsystur á laugardeginum sem var í stuttu stoppi í Køben á leið sinni til Spánar. Þar fögnuðum við 3 ára útskriftarafmæli okkar úr Kvennaskólanum í Reykjavík.

Á sunnudeginum lenti svo Pétur Einars í Køben. Fór um kvöldið með honum niður í bæ á Pilegarden. Á mánudeginum kvaddi ég svo Hildi með tárum en geta huggað mig við það að hún kemur aftur innan við mánuð á Hróaskeldu.

Í vikunni kláraði ég ritgerðina mína um Lars Von Trier og er nú á fullu að vinna í hinni ritgerðinni. Verður ósköp ljúft þegar þetta klárast allt saman. Var svo mikið með Rósu og fjölskyldu, en Þröstur samblýlismaður hennar mætti á mánudeginum. Fórum nokkrum sinnum út að borða og skemmtum okkur saman. Fórum í Tívolí þar sem Arnar litli frændi teymdi mig í öll tækin og til að halda orðsporinu sem svali stóri frændi hlýddi ég bara.

Þau fóru svo á föstudeginum en sama dag lenti Dagrún systur. Get ímyndað mér að það sé nokkuð ruglandi að lesa um þessar endalausu systur mína ef þið þekkið ekki vel mín fjölskyldubönd. Hún var hérna í hjólakeppni og stóð sig með prýði. Fór tvisar með henni út að borða, í seinna skipti á Loppen sem er frægur staður í Christaniu og kom svona skemmtilega á óvart.

Um helgina datt maður í smá rugl með Pétri Einars enda kominn tími til eftir rólegheit undanfarnar vikur. Pétur Már var svo einnig með vini sína hér og kíktum við saman í bæinn. Spilaði svo leik með IF Guðrúnu vegna manneklu en leikurinn vannst 6-4. Í gær og í dag er svo líkaminn minn að refsa mér fyrir að spila með endalaust af strengjum og verkjum.

Já, þessi færsla er frekar óskiljanleg og öll í kös. Er líka eflaust að gleyma einhverju. Nenni ekki að gera þetta betur enda á ég að vera að skrifa.

Leiter.

Heitt

2007-05-23T13:35:00.000Z

Hvernig á að vera hægt að sitja inni og skrifa ritgerð í 20 stiga hita og glampandi sól?

Ritgerðarskrif og tilhlökkun til sumars

2007-05-20T18:59:00.000Z

Er mest að dúlla mér við skriftir þessa dagana. Tímarnir búnir í skólanum svo nú get ég helgað mig algerlega skrifum. Gengur alveg sæmilega og er ég kominn vel á veg með fyrri ritgerðina. Enda nauðsynlegt að byrja haska sér enda von á gestum á næstunni. Hildur mætir á fimmtudaginn og verður eitthvað inn og út úr C-104, en það er barist um stelpuna þegar hún er í Kaupmannahöfn enda á hún marga að hér í borg. Svo verður víst Rut bekkjarsystir úr Kvennó líka á svæðinu svo maður reynir að hitta á hana. Eftir viku mætir svo Pétur Einars hingað. Svo það er ágætis dagskrá framundan.

Eins og ég hef sagt áður þá skila ég seinni ritgerðinni 18 júní. Eftir það er ekkert planað fram af Hróaskeldu og lítur út fyrir mitt fyrsta sumarfrí í mörg ár. Er ætlunin að njóta seinustu daga hérna í Kaupmannahöfn og nýta góða veðrið og jafnvel kíkja til Árósa. Fer svo á Hróarskeldu 5-8 júlí, þar eru Orri, Bjarmi og Hildur búin að staðfesta komu sína og er mikil tilhlökkun af minni hálfu fyrir hátíðinni. Svo er það bara heimferð 12 eða 13 júlí og beint í vinnu í Eimskip. Um Verslunarmannahelgina er búið að plata mig til Eyja á Þjóðhátíð og er ég nett spenntur fyrir því líka enda aldrei farið áður, ekki þó að spennan sé eitthvað á við Hróa. Annað er svo ekki stórplanað þetta sumar en í haust er markmiðið að kíkja á Tinnu í Alabama með Bjarma enda síðasta tækifæri til að nýta sér fría gistingu hjá henni því hún útskrifast næsta vor. Svona er sumarið mitt í grófum dráttum.

Ekki meira að sinni. Leiter.

15 apríl til 15 maí

2007-05-18T12:51:00.000Z

Number of workouts 20
Total Distance 166.36 km
Total Time 14.11 klst
Total Calories 14953
Average pace is 5´07 per km

Heimild: iPodinn minn

Kosningavaka

2007-05-14T20:10:00.000Z

Spennandi kosningum lokið. Er búinn að vera nokkuð úr sambandi þessar kosningar enda búsettur í öðru í landi. En að sjálfsögðu nýtti ég mér minn lýðræðislega rétt og kaus utankjörstaðar í Sendiráðinu í Kaupmannahöfn. Með um það bil 10.000 þúsund manns búandi í Kaupmannahöfn fannst mér skrýtið að ekki var lögð meira áhersla hjá flokkunum að kíkja hingað og kynna málefnin sín. Sá samt að Samfylkingin hefði komið hingað en hef ekki fundið neitt frá öðrum flokkum. Gæti haft eitthvað með það að gera að nún er hægt að finna mest allt um kosningastefnur flokkanna á netinu ef fólk hefur áhuga.

Þarf ekkert að fara ítrarlega yfir úrslitin. Annað hvort vitið þið þau eða þið hafið ekki áhuga á að vita þau. Ég var nokkuð ánægður með kosningarnar í heild sinni. Sáttur með árangur Sjálfstæðisflokksins og að ríkisstjórn hélt velli. Ekki kannski eins ánægður með fréttir þess efnis að hún ætli að halda áfram óbreytt. Fannst kjósendur vera að senda Framsókn viss skilaboð. Finnst líka ekki rétt að vera með ríkisstjórn þar sem einungis einn aðili þarf að vera ósammála svo að stjórnarandstæðan fái meirihluta. Með formanninn ekki á þingi og innanbúðarmál í nokkru ójafnvægi uppá síðkastið hjá Framsókn finnst mér ekki rétt að halda áfram ríkisstjórn Sjálfstæðisflokk og Framsókn. Þó mundi ég kjósa þá ríkisstjórn fram yfir gamla R-lista samstarfið sama hvaða dag vikunnar sem er.

Árangur Sjálfstæðisflokk og Vinstri-Græna var glæsilegur í þessum kosningum. Sjálfstæðisflokkurinn er búinn að vera í ríkisstjórn síðustu 16 ár og hefur tæklað mörg umdeild stórmál á þeim tíma. Bættir við sig 3 nýjum þingmönnum, er enn lang atkvæðamesti flokkur landsins og nýtur mest traust. Með Vinstra-Græna er þetta einnig frábær sigur sökum þess að hér á landi er til annar jafnaðarmannaflokkur, sem er reyndar ekki eins langt til “vinstri”, og flokkur þar sem umhverfismál eru númer 1,2 og 3. Það virtist þó ekki koma af sökum og flokkurinn bætti við sig 4 nýjum þingmönnum.

Ég og Oddur horfðum saman á kosningarnar. Kosningavaka er eitt af mínu uppáhalds sjónvarpsefni og hefur verið alveg frá því að ég horfði á mínu fyrstu Alþingiskosningar 1995 með afa og ömmu upp á Grundargerði. Mér fannst þetta rosa spennandi og hef í raun ekki enn komist yfir þessa spennu. Ég entist til 5 af dönskum tíma þegar ég eiginlega rak Odd út sökum þreytu og fór í rúmið með fallna ríkisstjórn. Vaknaði svo 11 daginn eftir og flýtti mér að kíkja inn á mbl.is, ég vissi það ekki þá en lokaniðurstöðurnar voru bara nýdottnar inn og ríkisstjórnin hélt velli.

Ég kaus eins oft og ég gat

2007-05-11T08:06:00.000Z

...en það var bara ekki nóg.

Stjórnmálaskoðanir

2007-05-08T11:22:00.000Z

Tók fremur kjánalegt og mjög svo staðlað próf á netinu sem á að gefa manni vísebendingu um hvert maður hallast í íslenskum stjórnmálum.

Útkoman var þessi:

Stuðningur við Sjálfstæðisflokk: 68.75%
Stuðningur við Framsóknarflokk: 30%
Stuðningur við Samfylkinguna: 37.5%
Stuðningur við Vinstri-Græna: 18.75%
Stuðningur við Frjálslynda flokkinn: 39%
Stuðningur við Íslandshreyfinguna: 40%

Skoðanir þínar eru í mestu samræmi við skoðanir Sjálfstæðisflokksins!

Kom þetta einhverjum virkilega á óvart?

Sønderborg, Parken, Eurovision og Nas

2007-05-07T20:15:00.000Z

Flott ferð til Sønderborg frá fimmtudegi til laugardags. Virkilega gaman að sjá Evu systir sjá hvernig hún og fjölskyldan lifðu. Þetta er ágætis bær, lítill og virkilega danskur. Lumaði á sögulegum minjum frá bardögum Dana og Þjóðverja um hertogadæmin Slésvík og Holstein sem ég náði að skoða. Pabbi var á svæðinu með nýja barnið í fjölskyldunni, þ.e. hjólið sem er líka svona flott. Litli bróðir fékk samt ekki að koma út að leika því pabbi fann bílskúr og geymdi brósa þar alla helgina. Ég fékk þó far á því á leiðinni til bílskúrsins sem ég naut til hins ítrasta.

Fór svo á Parken með Oddi um eftirmiðdaginn á laugardaginn. Þar gátu FCK menn tryggt sér titilinn með sigri. Það leit vel út þegar fyrirliðinn Tobias Linderoth kom þeim yfir í fyrri hálfleik. En á fimm mínúta kafla í seinni hálfleik náðu Aab að fresta titilfögnuðnum um einn leik í það minnsta með því að skora tvö mörk. FCK fengu þó fullt af færum en inn vildi boltinn ekki. Þessi úrslit ættu þó ekki að koma að sök því FCK með góða forrystu á toppi deildarinnar. Skemmtilegur leikur í alla staði þó svo að það hefði verið óskandi að geta tekið þátt í titilfagnaðarlátunum. Ekki skemmdi svo fyrir að það voru um 32.000 manns á vellinum og virkilega góð stemming allan leikinn.

Á sunnudaginn kom besta veður vorsins hingað til 22 stiga hiti og glampandi sól. Mér til mikillar furðu náði ég bara að vera nokkuð duglegur að læra framan af degi en svo sigraði sólin mig og ég fór út að hlaupa og tók létt tan-session með crewinu.

Þarf að vera duglegur að læra vegna allra þessa komandi heimsókna. Nú síðast var Pétur Einars að bætast í hópinn. Hann kemur í lok maí og rifjar upp gömul kynni við Kaupmannahöfn. Hann nýtir sér svo tækifærið á meðan hann er hérna og fer á tvo tónleika. Þá Xzibit og Nas rapparann góðkunnu, ég neita því ekki að það heillar mig nokkuð að fara á Nas en við verðum að sjá hvað fjármagnið leyfir í lok mánaðarins.

Ég get loksins gefið Íslandi eitthvað tilbaka eftir öll þessi ár sem eyjan hefur gefið mér heimili. Á fimmtudaginn er eins og alþjóð veit undankeppni Eurovision og mun ég í fyrsta skipti nýta minn rétt til að kjósa í einhverju svona sjónvarps tengdu. Ég mun kjósa eins oft og ég get til að reyna koma Eiríki Hauks áfram í úrslitakvöldið þó að ég hafi ekki einu sinni heyrt lagið enn. Annað er ekki planað í vikunni nema lærdómur.

Annars er ég nokkuð ósáttur með sjálfan mig í myndartökumálum. Var annsi duglegur fyrst þegar ég kom en er búinn að vera latur eftir áramót. Þarf að fara taka fleiri myndir. Til skammar að ég tók ekki mynd af Evu og fjölskyldu eða pabba á hjólinu. Svei svei, ég lofa bótum betrum á þessu sviði og auðvita mun ég deila afrakstrinum með lesendum þessra síðu.

Þetta var Gunnar Þorbergur Gylfason fyrir gunnitobbi.blogspot.com. Veri þið sæl.

Søndeborg

2007-05-02T21:52:00.000Z

Lítið heyrst í mér. Enda lítið að segja. Ég vakna, læri, fer út að hlaupa, læri og fer svo að sofa. Inn á milli fer ég í tíma og reyni að skemmta mér með öðrum.

En á morgunn brýt ég upp rútínuna. Ég ætla að heimsækja Evu systur til Søndeborg, sem er dönsk borg sem er á Jótlandi og liggur nærri Þýskalandi. Þar verður líka pabbi en hann er að sækja mótórhjólið sitt fræga sem ég skrifaði um hér fyrir nokkru.

Verð þar fram á laugardaginn en þá er markmiðið að fara á Parken og sjá FCK. En Oddur stærðfræðingur er búinn að reikna það út að ef FCK vinnur þann leik verða þeir meistarar. Sérstaklega gaman að vera á Parken ef það gerist.

Fríða systir er svo væntanlega einhvern tímann seinna í mánuði svo það er heimsókn til að hlakka til.

Ég er annars svo tómur að ég kveð bara að sinni. Farið vel með ykkur.

Molar

2007-04-24T22:31:00.001Z

• Fór í póker með nokkrum strákum úr IF Guðrúnu á föstudagskvöldið. Gerum þetta svona á 3 vikna fresti og höfum gaman af. Leggjum oftast bara 50 danskar undir svo þetta er enginn rosa pottur sem sigurvegarinn fær enda meira gert til að hafa gaman af og svo til að þessir sem eru í sambandi fá smá frið frá kærustunum.

• Fór í skoðunarferð í höfuðstöðvar Nordisk Film með kvikmyndakúrsnum mínum á laugardaginn. Ótrúlegt að eitt elsta kvikmyndastúdíó í heimi hafi ekki áhugaverðari túr um svæðið sitt. Þarna var eiginlega ekkert að skoða nema tóm stúdío endurgerðir af gömlum settum. Leiðsögumaðurinn okkar talaði líka mjög lélega ensku sem var ekki til að auka áhugann.

• Um kvöldð var svo surprise afmælispartý fyrir hana Kristínu hans Odds. Óvænta uppákoman tókst fullkomlega og allir skemmtu sér vel í partýinu sem fylgdi eftir. Við gáfum stelpunni blender (sem Hödda tókst þó að eyðileggja seinna um kvöldið…) og var farið í að blanda kokteila. Skemmtileg tilbreyting frá bjórnum.

• Pálmar sagnfræðifélagi var svo Íslandsmeistari í handbolta á sunnudaginn. Þar sem hann er manna duglegastur að kommenta á þetta blogg finnst mér tilvalið að óska honum til hamingju með árangurinn hérna.

• Er búinn að vera mjög duglegur að hlaupa og er formið er allt koma. Er búinn að setja stefnuna á 21km í Reykjarvíkurmaraþoninu í sumar. Fer samt bara ef ég tel mig geta bætt tímann minn frá því í fyrra sem er 1:34, vil helst vera undir 1:30. Eina sem ætti að koma í veg fyrir það er hnéið mitt sem er búið að vera stríða mér og, já, kannski bjórinn.

• Hefði átt að monta mig aðeins meira af veðrinu í síðustu færslum því eftir þennan sólríka dag er eiginlega búið að vera frekar leiðinlegt veður. En nú á að fara aftur hlýnandi, ég vona bara að ég hafi ekki jinxað þetta aftur.

• Nú tekur við prófatörn hjá mér. “Prófin” mín eru tvær 15 bls ritgerð. Í kvikmyndakúrsnum ætla ég að skrifa um danska leikstjórann Lars Von Trier og er skiladagur 1. júní. Í hersetu kúrsnum mínum ætla ég að bera saman resistance hreyfingar í Danmörku og Noregi á meðan hersetu Þjóðverja í Seinni Heimsstyrjöldinni stóð yfir, sú ritgerð á að skila 18. júní.

• Hildur er svo væntanleg hérna Hvítasunnuhelgina í viðtal vegna skóla sem hún sótti um. Tilviljun ein réði því að einmitt sömu helgi er önnur bekkjarsystir í Köben en það er hún Rut. Ætli þær eigi ekki eftir að draga mann á svona eins og eitt kaffihús til ræða málin. Ég held það bara.

Sól sól skín á mig

2007-04-16T16:02:00.000Z

í dag, 16. apríl, fór ég í sólbað í fyrsta skipti þetta sumar. Það var um 20 stiga hiti og sólin skein glatt. Fínt að fara út og lesa sína lexíur í svona veðri. Vonandi er þettta fyrirheit um gott sumar þó svo að spámennirnir segi að hitastigið eigi að lækka um helming þegar líða tekur á vikuna.

Hróarskeldumiðar komnir í hús

2007-04-15T13:24:00.000Z

Ekki frá því að spennan sé byrjuð að magnast enda einungis 76 dagar, 16 tímar, 31 mínúta og 58 sekúndur í hátíðina þegar þetta er skrifað.

Frá lubba yfir í Bubba

2007-04-14T10:16:00.000Z

Myndirnar tala sínu máli

Langt síðan ég ákvað þetta en lét loksins verða af þessu í gær. Svona bara til að gleðja mömmu því henni finnst ég svo ljótur svona. Rakvélin var því miður ekki nógu góð svo að það var tekið aðeins of mikið að hárinu að mínum dómi. Verður betra eftir nokkrar vikur. Ég er samt hæstánægður með árangurinn.

Hér má sjá fleiri myndir.

Páskarnir og heimsókn Gagga

2007-04-13T23:27:00.001Z

Við félgarnir erum búnir að bralla margt og mikið, lítið og skrýtið á þessari viku heimsókn Garðars. Við snæddum saman fajitas á Páskadag, eflaust í fyrsta og eina skitpið sem ég borða mexikóst á þeim degi. Fljótlegt og gott. Garðar treystir sér miera að segja til að mæla með þessum rétt.

Ætluðum að grilla lambið sem hann kom með á páskadag. En það rigndi bara svo mikið. Daginn eftir var aftur á móti heiðskýrt og kjörin aðstaða til grill iðkunar. Þá grilluðum við þetta fína páskalæri sem heppnaðist líka svona vel. Var þetta frumraun mín í lambagrilli, allavega svona frá a-ö, hef áður staðið yfir lambinu, drukkið bjór og þóst gera eitthvað. En núna þurfti ég að hugsa um sósuna, meðlætið og borðhaldið, mikil ábyrgð sem ég tæklaði vel. Við buðum svo Oddi og Kristínu að njóta matarins með okkur. Voru allir á því að þetta smakkaðist mjög vel. Þetta geutr maður ef maður tekur sig til. Garðar á þó skilið sitt hrós við þessa eldamennsku.

Við heimsótum í Carlsberg verksmiðjuna, enda áhugamenn um hinn gyllta löður. Mér finnst alltaf jafn gaman að heimsækja "mekka" bjórsins. Fjárfesti meira að segja í einhverjum minjagripum frá verksmiðjunni og er ég núna kominn með ágætis safn sem stækkar með hverri heimsókn.

Fyrir utan að ganga endalaust upp og niður Strikið erum við búnir að heimsækja Fisketorvet og Fields sem eru tvær stærstu verlsunarmiðstövarnar hér í borg. Garðar búinn að standa sig vel í eyðslu og búinn að fjárfesta í ýmsum hlutum. Það er mun auðveldara að versla með honum heldur en tveim síðustu gestum mínum.

Búið að vera heitt og gott síðustu daga. 15 stiga hiti og sól. Eum við búnir að nýta sólina mjög vel. Fara út að hlaupa og hanga úti allan liðlangan daginn. Fórum í siglingu um canalinn í dag sem var fróðlegt og skemmtilegt. Veðrið fullkomnaði siglinguna enda glapandi sól. Ekki frá því að ég sé aðeins rjóðari kinnum en ég var fyrir.

Mamma kemur svo óvænt í vinnuferð hingað á morgunn. Markmiðið að hitta hana í þessa tvo frítíma sem hún fær. Á meðan sendi ég Gagga í Tívolið með Pétri Má. Buddan mín er þakklát fyrir að sleppa við sá ferð enda er ég ekki enn búinn að fjárfesta í nýju árskorti, á meðan grætur þó barnið í mér.

Garðar flýgur svo heim á sunnudaginn. Búið að vera frábært að hafa hann og erum við búnir að skemmta okkur ærlega. Verður þessi vika lengi í minni höfð.

Búið. Meira fljótt.

Málshátturinn minn

2007-04-08T20:33:00.001Z

Ber er hver á baki nema sér bróður eigi.

Gleðilega Páska

2007-04-08T09:23:00.000Z

Já, gleðilega páska allir saman. Ég ákvað að kasta inn þessari kveðju á meðan ég bíð eftir að haugurinn hann Garðar vakni. Vikan var annars pollróleg og lítið gert.

Kíkti þó í póker með strákum úr IF Guðrúnu á föstudaginn og smá øl eftir það. Loks fór ég heim með pottinn eða potturinn endaði í vasanum á konunni á barnum.

Garðar lenti í gær. Tókum því rólega og helguðum deginum okkar helstu ástríðu. Að horfa á fótbolta. Döpur úrslit voru ekki nóg til að slá okkur af laginu og vorum við að fíflast og hlæja nánast allan daginn.

Í töskunni með Gagga komu ýmsir hlutir frá foreldrum mínum. Þar ber hæst að nefna nýja hlaupaskó sem ég get ekki beðið eftir að vígja. Auk þess kom þetta upp úr töskunni. Ég er alveg að deyja að prófa þetta enda smá Apple óður. Því miður á ég ekki iPod Nano. Á einhver tvo og vill losa sig við einn?

Ég er farinn að ráðast á páskaeggið mitt. Hafið það gott um páskana.

Páskfrí

2007-04-02T22:11:00.001Z

Veikindi og ritgerðarvinna komu í veg fyrir að ég skrifaði eitthvað hérna inn í síðustu viku. Það gerðist líka frekar fátt. Gott veður en ég þurfti að hanga hérna inni með einhverja pest að rembast við að skrifa. Það gekk svo ekkert að skrifa, þarf nú að klára 2 bls við ritgerðina og senda hana á kennarann minn.

Á föstudaginn fór ég í páskafrí og þarf ekkert að mæta aftur í skólann fyrr 10. apríl. Gott að fá smá frí. Verð í einhverri ritgerðavinnu en annars rólegur þangað til að Garðar mættir á svæðið á laugardaginn. Hann mun koma eins og páskakanína hlaðinn góðgæti. Páskalæri, páskaegg, Ora korn og piparostur. Þetta verður svo allt sett í páskadagsveisluna okkar. En skemmtilegast verður að fá strákinn.

Fór á sunnudaginn í gönguferð um slóðir Íslendinga í Kaupmannahöfn. Guðlaugur Arason rithöfundur sér um þessar göngur. Ég hafði mikið gagn og gaman af. Guðlaugur er virkilega fróður og kemur upplýsingunum skemmtilega frá sér. Mæli ég eindregið með þessu ef þið eruð eitthvað að væflast í Kaupmannahöfn og viljið fræðast um sögu Íslendinga hér. Það er nóg af henni, enda var nú þetta einu sinni höfuðborg Íslands í um 500 ár. Annars er ég orðinn nokkuð fróður um Kaupmannahöfn eftir að hafa farið í þennan túr, hlustað á fyrirlestur um byggingarsögu Kaupmannahafnar, farið í kúrsa sem tengjast Kaupmannahöfn og farið í gönguferð um stríðsmynjar Kaupmannahafnar frá Seinni Heimsstyrjöldinni. Treystu mér samt ekki í það vera tour guide strax.

Nú eru allir farnir heim til Íslands í páskafrí. Er því nokkuð einn hérna en hef gaman af. Finnst gott að vera einn. Enda er að mínum dómi nokkuð nauðsynlegt að fólk kunni að vera félagsskap með sjálfum sér. Þó svo að það sé nú skemmtilegra að hafa einhverja í kringum sig. En Garðar kemur nú bara eftir nokkra daga svo þetta er ekkert slæmt. Það er líka ekki eins og ég sé einn í Kaupmannahöfn.

Ég held að mér sé óhætt að segja að vorið sé komið hingað. Hitastigið hefur verið að hækka og sólin er byrjuð að heiðra mann með nærveru sinni. Eftir veikindinn hef ég verið duglegur að hlaupa og það er frábært að hlaupa í svona veðri. Á stuttbuxum í sólskinni í mars. Best að njóta þess meðan maður getur.

300

2007-04-02T21:59:00.000Z

Fór á 300 á laugardaginn. Búinn að vera bíða eftir henni frá því ég sá fyrsta trailer-inn af henni. Mér fannst hún góð. Gríðarleg vel stílstuð og tölvuvinnsla flott. Handritið ágætt, flest samtölin eru gríðarlega dramtískar hetjuræður sem skilja ekki mikið eftir sig, en þjóna myndinni vel. Ég ætla samt ekkert að koma með kvikmyndagagnrýni hér heldur að fjalla um annað málefni sem tengist þessari mynd.

Var búinn lesa og heyra um myndina áður en ég fór á hana. Þar var hún kölluð sögufölsun á hæsta stigi og í raun áróður Bandaríkjamanna gagnvart Írönum. Las grein í Fréttablaðinu um þetta fyrir um það bil viku síðan. Mér finnst rétt að menn hafi nokkrar staðreyndir bak við eyrað.

Það er rétt að myndin er lauslega byggð á bardaga sem gríski sagnaritarinn Heradótus, almennt kallaður faðir sagnfræðinnar, lýsti í verki sem hann skildi eftir sig. Ég ætla nú ekkert að sverta hans nafn enda er hann ekki í aðstöðu til að verja sig og hefur eflaust gert sitt besta miðað við tíð og tíma. En menn verða lesa hans skriftir með gagnrýnum hug. Sagnfræðileg vísindalega vinnubrögð þekktust ekki á þessum tíma. Þess fyrir utan að hann var hlutdrægur sem Grikki vegna þess að allt Grikkland græddi á “sigri” þessa 300 manna. Þess vegna getur verið að hann hafi farið frjálslega með staðreyndir, á hann til dæmis að hafa ýkt mannfjölda Persa mikið.

En aðalatrið er samt að þessi mynd er byggð á “graphic novel” eftir Frank Miller, sá hinn sama og skrifaði graphic novel-ana Sin City og Batman Returns. Myndin er víst sönn sögunni og byggð upp eins. Ég verð að viðurkenna að ég hef ekki lesið þessa myndasögu en menn sama hafa gert það eru víst sammála um þetta.

Þess vegna finnst mér að menn ættu að fara rólega í að dæma þessa mynd á þeim forsendum að hún sé ekki sagnfræðilega rétt og hrein og klár sögufölsun. Því hún gefur sig aldrei út fyrir að vera sagnfræðilega rétt þó svo að hún gerist á þessum tíma. Menn eiga að njóta hennar sem sem myndasögu kvikmynd líkt og Sin City. Að gagnrýna hana fyrir sögufölsun er svipað og íbúar Basin City í Bandaríkjunum mundu gagnrýna Sin City sem áróðursmynd gagnvart borginni.

Persónulega fannst mér gaman af því hvað Spartverjarnir voru breskir í háttum og töluðu ensku með miklum hreim. Hefðu þeir ekki tekið fram að þeir væru Spartverjar í annarri hverri setningu hefði ég allt eins ímyndað mér að þetta væru breskir stríðsgarpar. Er það rétt nálgun á mynd sem þykist vera sagnfræðilega rétt?

Með gagnrýni Írana hef ég lítið að segja. Það gæti vel verið að ástandið í dag hafi eitthvað með það að gera að þessi mynd hafi verið gerð, flýtt framleiðslu eða fjármögnuð. En ég ætla ekki að trúa að þetta sé pólitískt verk nema Frank Miller segi að það sé svo, enda höfundurinn á verkinu og sá eini sem veit svarið.

Topp 5

2007-03-24T15:35:00.001Z

Klúbbar í heiminum í dag:

1. Grótta
2. Manchester United
3. FC Barcelona
4. FC København
5. IF Guðrún

Þjóðfélagsmál og Páskar

2007-03-22T17:16:00.000Z

Mikið hægt að plokka úr þjóðfélagsmálum heima til þess að skrifa um. Hef samt ekki lyst á því. Hingað til hefur þetta blogg verið mjög sjálfhverft og einungis fjallað um mig og mitt daglega líf. Er ég tilbúinn að fórna því og byrja skrifa um samfélagsmál? Eða er hægt að sameina þetta?

En ef ég ætla að byrja á því þá er núna fullkominn tími til þess. Þingkosningaár. Þau gerast ekki stærri viðfangsefnin en það. Nú síðast í dag var nýtt kosningaafl tilkynnt. En eins og áður segir hef ég ekki lyst á því að skrifa um það í dag. Pálmar félagi hefur hins vegar verið mjög duglegur við sleggjublogg uppá síðkastið. Ég hvet alla til þess að kíkja á síðuna hans og lesa það sem hann hefur að segja. Hann er nokkuð lunkinn penni að mínum dómi.

En aftur að mér. Ég fer ekki heim um páskana. Ég hef ákveðið að vera hérna úti. Ég skal ferðast til Jótlands til þess að hitta eina af mörgum ská-systur mínum, hana Evu og fjölskylduna hennar. Ég fæ heimsókn frá Garðari vini mínum frá 7-15 apríl eða í lok páskana. Ég hlakka mikið til þess. Ég mun reyna að nýta frítíman í páskafríinu til lærdóms enda vil ég helst ekki þurfa að vera læra allan júní í öllum hitanum og gleðinni. Ég hef ekki meira að segja í augnblikinu.

Er ég sjálfhverfur?

Ehha?

2007-03-19T17:27:00.000Z

Smá liðið frá síðustu færslu. Það útskýrist bara á því að ég er búinn að vera frekar upptekinn. Á miðvikudaginn lentu þær Eva og Jóna. Það var farið beint á Strikið í framhaldinu. Þar varð ég vitni að mesta vilja til eyða pening sem ég hef nokkurn tímann upplifað. Búðirnar áttu aldrei séns og gátu ekkert gert á meðan vörurnar flugu úr hillunum í hendur tveggja kaupóðra stelpna. Ég stóð í losti og hélt á pokunum því þær voru “fljótari” að versla með báðar hendur lausar. Um kvöldið var farið á Wagamama sem er núðlustaður, sem Fríða systir kynnti mér fyrir, og var maturinn mjög góður. Svo var að sjálfsögðu dottið á Kollegibarinn um kvöldið en þreyta í stelpunum varð til þess að farið var snemma heim. Þá var líka þessi veisla í sjónvarpinu eða Baywatch og var sofnað út frá þeim gríðarlega góða þætti.

Þetta breytist ekkert seinni daginn. Ég kynntist H&M búðunum enn betur. Held að ég gæti fengið mjög auðveldalega vinnu þar enda þekki ég eflaust vörunar og búðirnar betur en sjálfir starfsmennirnir. Það var gleymt sér svo mikið í búðunum að það gafst ekki einu sinni tími til að fara í Carlsberg verksmiðjuna. En um fjögur leitið tóku stelpurnar lestina til Odense til Hildar Gísla og fékk ég þá kærkomið frí frá búðunum.

Á föstudaginn var mér boðið í læri til Hödda og Önnu Láru. Að sjálfsögðu voru þar líka Oddur og Kristín. Lærið heppnaðist rosa vel og þakka ég þeim fyrir frábæran mat. Svo var spilað og sötrað. En ég fór snemma heim enda var námsferð daginn eftir í Cinemateket sem er kvikmyndasafn þeirra Dana. Þar var okkur sýnt myndin sem var valin besta mynd Danmerkur á síðastliðnu ári. Hún heitir En Soap og segir frá sérstöku sambandi á milli konu og manns sem er á leið í kynskiptiaðgerð. Forvirtnileg mynd sem ég er alveg reiðubúinn að mæla með.

Eftir fyrsta leik dagsins í enska boltanum fór ég svo til Odense að hitta stelpurnar. Anna Lára var þá farin heim til Íslands og hann Höddi minn orðinn munaðarlaus. Svo ég tók hann bara að mér og fórum við saman. Í Odense hittum við stelpurnar og fórum út að borða á Jensens. Svo var farið á djammið í boði Ópals og Carlsberg. Næturlífið var nokkuð gott þarna í Odense og skemmtilega breyting frá kollegibarnum. Þó þótti lagavalið frekar lélegt en ég er nú orðinn frekar vanur því hér. Það var samt hægt að dilla sér við þetta.

Á sunnudaginn var mikið rætt um yfirvigt og hugsanlega aðferðir frá því að losna við yfirvigt. Lánaði ég flugfreyjutöskuna mína svo komist væri frá yfirvigt, þetta var mikið mál þarna en reddaðist allt að lokum. Svo haldið aftur til Kaupmannahafnar. Í lestinn stóðum við fjögur í milligangi því öll lestin var full. Ég og Höddi nokkuð þunnir og vel útlítandi og stelpurnar með úttroðnar töskur svo enginn komst framhjá. Pizza var borðuð við þessar aðstæður og 1,5 Kókflaska látin ganga á milli manna. Rosalega góður fílingur í þessu öllu saman.

Ég vil þakka Eva og Jónu fyrir samveruna og þakka fyrir heimsóknina, það var mjög gaman að fá ykkur og ég er tilbúinn að segja að ég skemmti mér alveg ágætlega við það að versla. Svo auðvita einnig öllum hinum fyrir góða helgi.

Eva var dugleg á myndavélinni og lofaði að láta mig vita þegar hún væri búinn að kasta inn myndum úr ferðinni. Ég gef þá link á myndasíðuna um leið.

Er vorið komið?

2007-03-12T19:45:00.000Z

Þá er ein önnur helgin flogin í burtu. Þessi helgi var strákahelgi. Horft var á knattspyrnuleiki og spilað var póker og PES. Í bland með smá øli, að s jálfsögðu.

Á miðvikudaginn fæ ég mína fyrstu heimsókn í smá tíma. En þá mæta tvær mætar meyjar á svæðið. Það eru þær Eva og Jóna. Þær eru eiginlega að fara í heimsókn til Hildar Gísla en vildu fá einn dag í stórborginni til að versla svo þær verða hér hjá mér í eina nótt. Svo fer ég kannski til Odense um helgina og kíki á þær. Það verður fínt að fá þær og fá smá pásu úr þessari daglegu rútínu. Vona bara að ég þurfi ekki að vera of lengi í H&M.

Það er loks byrjað að hitna hérna úti. Í dag var 15 stiga hiti og sól. Nýtti mér góða veðrið og fór út að hlaupa. Það var æðislegt að hlaupa aftur í stuttbuxum, langt síðan það var hægt síðast. Ekki frá því að ég sé kominn með smá lit eftir þetta stutta hlaup. Það er vonandi að þetta sé upphafið af góðu sumri.

Annars fór dagurinn í dag í það að taka til, verður víst að vera hreint þegar maður fær gesti. Tók ég ltilu íbúðina mína í gegn og þvoði þvott. Ég er ábyrgur íbúðarleigjandi. Svo í kvöld tek ég mér smá frí og horfi eitthvað á Dexter en ég var að fá seinni hluta seríunnar. Ég er nokk spenntur.

Lítið annað ske. Sæl að sinni.

Afmæliskveðjur og bikarúrslit

2007-03-08T23:05:00.001Z

Pabbi minn á afmæli í dag. Hann er 55 ár. Í tilefni þess ákváðu hann og móðir mín að ferðast til Flórída. Væntanlega til þess að kynna sér elliheimili. Ég er mjög lélegur að muna afmælisdaga og hef örugglega móðgað helming ykkar með því að muna ekki eftir afmælisdögunum ykkar. En þegar ég vaknaði í morgunn mundi ég strax að þetta var afmælisdagurinn hans pabba. Svo um 10 leitið ákvað ég að hringja í hann áður en ég mundi gleyma því. Þá var víst klukkan 4 um nóttina í US&A. Góð afmælisgjöf það.

Ég er að byrja á léttri 5 bls ritgerð um samanburð á skemmdaverkum í Danmörku og Noregi á meðan löndin voru hertekin af Þýskalandi í Seinni Heimsstyrjöldinni. Mér líst vel á verkefnið. Ef vel gengur þá stækka ég hana kannski 20 bls lokaritgerð í þessum áfanga.

Ég vil óska Gróttu stelpum góðs gengis í úrslitaleik bikarsins á laugardaginn komandi. Þó sérstaklega uppáhalds kvennhandboltaiðkandanum mínum henni Öddu. Það er vonandi að hún hristi þessi veikindi af sér fyrir leikinn. Ég á allavega eftir að bíða spenntur fyrir framan skjerminn á meðan leik stendur. Áfram Grótta.

Ekkert plan komið fyrir helgina. Ætli það verði ekki lesið og hreyft sig. Svo er Oddur búinn að lofa í póker á laugardaginn. Ætli ég hafi ekki gott að því að tapa eins og 100 dönskum þar, ég á nú svo mikið af þeim. Ég held það nú.

Icelandair Open 2007

2007-03-06T12:33:00.000Z

Fótboltamótið Icelandair open var hápunktur helgarinnar sem leið. Upphitun var á föstudaginn og dregið riðla. Eftir það var haldið í bæinn og fórum við í IF Guðrúnu á Pilegarden þar sem setið var að bjór og teningaspil. Auðvita var þó haldið heim snemma á leið þar sem keppnin hófst árla laugardags. Metnaðurinn gríðarlegur.

Mótið sjálft gekk ekki vel hjá mínu liði. Svo ég ætla ekkert að rita neitt meira um það, enda mitt blogg. En, einmitt þar sem þetta er mitt blogg, vil ég taka fram að ég skoraði mark og það gladdi mitt varnarmannshjarta mikið. Oddur náði að meiðast svo leikar snéru loks við og ég gat sagt honum að hætta þessu helvítis væli. Hann er núna á hækjum. Eftir mótið var farið og horft á stórleikinn í ensku knattspyrnunni. Á hann var horft á spólu þar sem leikurinn var spilaður á meðan mótið var enn í gangi. Mér fannst það ótrúlegt að þarna voru um 60 strákar og enginn gaf upp úrslitin svo þetta var eins og að horfa á hann beint. Vil ég þakka öllum fyrir það enda ekkert meira óþolandi en að vera horfa á leik þar sem maður veit úrslitin. Eftir leikinn var farið O´Learys sem er sportbar við Hovedbangarden, þar var boðið upp á burger. Svo var farið á öldurhús borgarinnar og var mikið um drykkju og ykkar einlægur var þar enginn undartekning. Það var þessi klassíski einum bjór of mikinn.

Sunnudagurinn fór í það að jafna sig andlega og líkamlega á mótinu. Var legið sitt á hvað í sófanum og rúminu allan daginn og ekki farið út úr húsi. En ég vil þakka öllum sem komu að þessu móti kærlega fyrir góða helgi. Alltaf jafn gaman að fara í gamla innanhúsfílingin og skemmti ég mér vel, þrátt fyrir óhagstæð úrslit.

Ætla að hlaupa í tíma, veri þið blessuð og sæl.

Topp 5

2007-02-28T15:08:00.000Z

Við hertöku Þjóðverja á Danmörku þann 9. apríl 1940.

1. Algjör afneitun Dana við yfirvofandi hertöku, þó sérstaklega hjá Dr. Munch utanríkisráðherra, jafnvel þó þeir höfðu verið varaðir við þýska hernum deginum áður.
2. Þegar Þjóðverjar sigldu inn höfnina í Kaupmannahöfn, snemma morguns þann 9. apríl 1940, ætluðu danskir hermenn sem stóðu vörð við höfnina að vernda Danmörku og skjóta á þá úr fallbyssum. Því miður kunnu þeir ekki á fallbyssurnar.
3. Í staðinn fyrir að flýja frá hermönunum eða bera merki um ótta þá þyrptist fólk að þeim forvitið um hvað var að gerast.
4. Þjóðverjar lokuðu götum við Østerbro sem varð til þess að fólk komst ekki áfram í nokkurn tíma. Þetta var helst umkvörtunarefni Dana þennan dag. Þetta varð einnig til þess að sumir af helstu ráðherrum Dana urðu seinir á mikilvæga fundi um hertökuna því þeir sátu fastir.
5. 13 hermenn á Jótlandi björguðu “heiðri” danska hersins með skjóta nokkrum kúlum í átt til Þjóðverja, þó án þess að hitta neinn. Þeir höfðu ekki fengið skipunina að það mætti ekki skjóta á Þjóðverja.

Norðmenn aftur á móti öfugt við Dani kunnu á sínar fallbyssur og skutu á Þjóðverja. Þeir reyndu að berjast á móti stórveldinu en áttu aldrei séns í þýsku stríðsvélina. Vegna þess að þeir börðust fengu þeir verri umönnun frá þeim þýsku á meðan hertökunni stóð miðað við Dani. Bitrir fundu Norðmenn upp á orðatiltækið “að flýja eins og Dani” eða “Run as a Dane” eins og kennarinn minn orðaði það. Það þótti mikil móðgun í Noregi ef þetta var sagt um nokkurn mann.

Það skal tekið fram að þetta er skrifað í kaldhæðnislegum tón og er ekki fullkomlega sagnfræðilega rétt. Sem sagt meira skrifað í gamansömum tilgangi.

Grái fiðringurinn

2007-02-26T20:53:00.000Z

Þau ykkar sem þekkið til pabba míns vita að hann er ekki eins og allir aðrir pabbar. Hans hugymynd um sumarfrí er að hlaupa maraþon eða klífa fjöll. Hann hefur meira að segja flúið til Ekvador að klifra fjöll yfir hátíðirnar til þess að komast hjá fjölskylduboðum. Þið sem þekkið mig vel vitið að þetta er frekar ólíkt mér. Það er kannski vegna þess hversu ólíkir við erum hve vel okkur kemur saman.

Fréttir að heiman herma að maðurinn sé kominn með gráa fiðringin. Það byrjaði víst mjög sakleysilsega. Hann keypti sér gítar og fór í gítarkennslu. Svo jókst þetta víst alltaf, hann keypti sér rafmagnsbassa og svarar ekki undir öðru nafni en Santana. Hann er búinn að biðja um svefnpláss hjá mér fyrir Hróaskeldu til þess að sjá hetjurnar sínar í The Who stíga á svið. Hann sagði að ef The Who væru nógu ungir til þess að spila á hátíðinni væri hann nógu ungur til að hlusta á þá þar. Ég mótmælti því ekki. En allt þetta er hneta miðað við hvað hann gerði nú síðast. Hann toppaði sig algjörlega með því að kaupa sér mótórhjól án þess að spyrja kóng né prest. Á ég nú að hafa áhyggjur af því að hann fari að yngja upp? Njéé, varla.

Hér má sjá pabba eyðileggja fullkomlega góða mynd af mér og mömmu.

Hann er víst væntanlegur í maí í heimsókn til mín til þess að koma hjólinu í ferju til Íslands. Ég er ekki mikil mótórhjóla maður svo ég get lítið frætt ykkur um þetta hjól. En það heitir víst Honda 650 Transalp og er ágerð 2006. Meira veit ég ekki. Svo það er aldrei að vita nema að ég fái mér mótórhjólapróf næsta sumar. En hugmyndin um mig á mótórhjóli í leðurgalla á Ingólfstorgi finnst mér frekar fyndin.

Annars var helgin með því allra rólegasta. Lítið á dagskránni þessa viku nema að stunda skólann. Um næstu helgi er svo Icelandair open. Það er innanhúsfótboltamót sem IF Guðrún heldur hérna. Það verður án nokkurs vafa heljarinnar fjör sem ég á eftir að sjá eftir næstu vikurnar þegar ég get ekki gengið án verkja. Að hlusta á mig, ég er byrjaður að kvarta áður en verkurinn er kominn. Ég er alger kjói.

Meira var það ekki.

Snjóstormur

2007-02-22T14:50:00.000Z

Þessar myndir eru ekki teknar á Akureyri. Nei, þær eru teknar í 2300 Kaupmannahöfn.

Allar samgöngur hafa tafist og sums staðar fellur vinna og skóli niður. Heima væri þetta nú ekki kallað mikið meira en snjókoma. Ojæja, það geta ekki allir verið eins.

Það er samt ekki gott að hjóla í snjó.

Getraun dagsins

2007-02-21T21:57:00.000Z

Hvaða sjónvarpsþáttur er þýddur yfir á dönsku sem "Rap fyr i LA"?

Himmaheimsókn

2007-02-20T12:53:00.000Z

Löng helgi að baki. Himmi mætti á fimmtudaginn og þá fór allt í gang. Ég eiginlega rankaði bara við mér á sunnudaginn með hausverk og enga peninga í veskinu. En fjandinn hafi það þetta var þess virði. Á fimmtudaginn var farið í bæinn og Hilmar keypti sér skó aldarinnar. LA Lakers strigaskó sem eru frekar smooth og var hampað alla ferðina. Eftir það var kíkt á kollegibarinn.

Föstudagurinn byrjaði með léttum tíma en ég kláraði skólann um 13. Þá héldum ég, Oddur og Höddi með túristann í Carlsberg og svo í Christaníu. Um að gera að skoða menninguna. Um kvöldið kom Sigga Hrönn yfir á kollegið og var mikið spjallað, hlegið og rifjað upp. Kvöldið endaði niðrí bæ á skemmtistaðnum Moose.

Á laugardaginn var haldið í Lundromat, sem er matsölustaður sem Frikki Weiz á í og er vinsæll með Íslendinga hér Køben. Þar fékk ég besta hamborgara sem ég hef smakkað á tíma mínum hér í Kaupmannahöfn. Um kvöldið var bjórkvöld hjá IF Guðrúnu. Þar var heljarinnar för. Gaman að segja frá því að Kristín, kærastan hans Odds, vann tvo miða fram og tilbaka til Íslands í happdrætinu. Svo var hringt í Jölla í gegnum Skype. Gaman að sjá strákinn þó svo samtalið hafi kannski ekki verið upp á marga fiska. Erfitt að vera þrír að tala við einn.

Á sunnudaginn fór ég í hjólatúr með Guðrúnu. Byrjað var að fara í Jónshús og keypt miða á Þorrablótið sem er um næstu helgi, ég er þó ekki að fara. Svo endaði túrinn eiginlega bara í skoðunarferð um Kaupamannahöfn þar sem meðal annars Litla hafmeyjan var heimsótt. Hún er alltaf jafn lítil. Hilmar var svo kvaddur um kvöldmatarleitið. Í tilefni konudagsins splæsti ég í símtal til Mömmu og Fríðu. Þær eru konunar í mínu lífi. Fríða á skíðum í Frakklandi, nett öfund í gangi hjá litla bróður.

Síðan buðu Anna Lára og Höddi í bolluveislu í gær. Það verður að halda fast í íslensku hefðinar þó svo maður sé staddur í öðru landi. Bollurnar sviku engann og voru mjög góðar.

Þessa vika fer örugglega mest í það að taka það rólega og halda áfram að æfa og læra. Meistaradeildarvika og skemmtilegheit.

Að lokum. Ég kastaði inn myndum á myndasíðuna mína. Þær eru allar mjög slæmar og vekja upp í mér nettan kjánahroll, sem betur fer get ég ritskoðað myndirnar áður en ég kasta þeim inn. En um að gera að skoða þær. Oddur tók fleiri myndir sem þið getið skoðað hér.

Ég vil bara enda með því að þakka Oddi og Himma, og jú öllum hinum líka, fyrir frábæra helgi.

Leiter

Mittpláss á myspace

2007-02-14T23:48:00.000Z

Ég gleymdi alltaf að segja frá því hverju ég lofaði Pétri Einars þegar hann flutt aftur heim. En það var að stofna myspace aðgang. Ég efndi loforðið er núna orðinn einn af mörgum notendum minnspláss. Með þessu var ég líka að fullkomna mitt rafræn líf. Ég vil líka kenna einmitt myspace um það hversu latur ég var við það að blogga. Það einhvern veginn átt minn tíma og það var aldrei tími fyrir að blogga. Síðuna mína má sjá hér og ætli ég hendi ekki líka í einn tengil á síðuna. Ef þið þekkið mig og eruð með aðgang megið þið alveg spurja hvort ég vilji ekki vera vinur ykkar, ég hef allavega einkum neitað enn.

Ég fór upp á Alþjóðaskrifstofu Kaupmannahafnarháskóla í dag því ég þurfti að fá undirskrift á eitthvað plagg um að ég væri í skóla fyrir kollegið mitt. Þar komst ég að því að ég náði báðum þessum ritgerðum sem ég skilaði inn fyrir áramót. Það gladdi mitt fátæka námsmannshjarta, því þá þarf ég allavega ekki borga LÍN þetta strax heldur bara með vöxtum og alla ævi.

Hilmar Guðjónsson lendir í Kaupmannahöfn á morgunn til að heimsækja vin sinn Odd. Ég vona að þeir hafi gert sér það fullkomlega ljóst að ég ætla að vera uppáþrengjandi gaurinn um helgina. Ef ég þekki þá rétt verður þetta heljarinnar helgi. Planið sett á Carlsberg verksmiðjuna, kollegibarinn og Bjórkvöld FC Guðrúnar.

Ég hef verið hrikalega slakur við það að taka myndir frá því ég kom hingað aftur en ég reyni að munda kubbinn um helgina og þá í framhaldinu leyfi ykkur að njóta afrakstursins.

Sæl að sinni

Bloggleysi

2007-02-12T23:45:00.000Z

Afsakið þetta bloggleysi. Ég hef einhvern ekki náð að koma mér í það að sitjast niður og pikka inn eitthvað sannleikskorn um mitt líf. Það er svo langt síðan að ég bloggaði að Ísland var enn í séns í HM þá. Ekki það að ég vilji rifja upp helvítis danaleikinn aftur. Við fórum niður á barinn til þess að drekka sorgum okkar það kvöld. Það var ekki hægt. “Vi er hvide, vi er røde” var spilað oft í gegn það kvöld. Okkur, skiljanlega, til mikils ama. Ef maður hefði ekki verið búinn að fjárfesta í bjór þá hefði maður gengið út og mótmælt. Elska ég bjór meira en mitt eigið þjóðarstolt?

Þar síðustu helgi hélt Pétur Már upp á afmælið sitt með litlu spilakveldi í Rødovre. Þangað var farið og skemmt sér í póker. Komst í bæði skiptin í úrslitin en tapaði þeim báðum, ég vil samt trúa að þetta fari batnandi. Við tókum S-tog á leiðinni heim um hálf-eitt. Á leiðinni koma tveir gaurar inn og setjast á básinn við hliðiná okkur. Þeir geta ekki hafa verið eldri en 18 ára. Þeir taka upp 100 krónu seðill, krítarkort og hvítt efni. Svo sjúga þeir í nös. Ég tel það góðan hlut að mér hafi brugðið eins og mér gerði. Ég þurfti bókstaflega að ná í hökuna mína frá gólfinu. Svona er greinilega þetta stórbæjar líf. Maður þarf að venjast því að það er notað kókaín í almenningssamgöngutækjum. Vá, ég hljóma alveg eins Víkverji í mogganum. En öngvu síður var þetta frekar spes lífsreynsla.

Á miðvikudaginn kom Pétur afmælisbarn og Siggar systir hans á kollegibarinn. Það var fínt kvöld og mikið rætt. Endaði ég í hörðum umræðum um veldi Sjálfstæðisflokksins í Garðabæ, mér líkar ekki einu sinni við Garðabæ. Á föstudaginn hjálpaði ég Hallgrími syni Önnu og Adda, vinahjóna mömmu og pabba, að flytja í stórglæsilega íbúð á Islandsbrygge. Eftir að hafa burðast með hjónarúmið upp 8 hæðir endaði kvöldið með bjór, pítsu og SingStar. Ég hef aldrei þótt góður í SingStar, aðallega þar sem ég er bæði falskur og laglaus, eitthvað sem þykir ekki gott í söngbransanum. Þó vann ég þarna minn fyrsta sigur í SingStar og þann eina hingað til. Þegar leið á kvöldið var farið í keppni milli kynjanna og komu í ljós miklir yfirburðir kvennanna. Dróg ég lið mitt verulega niður.

Á laugardaginn skrapp ég til Malmø í Svíþjóð með Guðrúnu og Önnu. Fyrsta skipti þar sem ég hef komið þangað og get ég alveg mælt með Malmø. Við gengum upp og niður helstu verslunargötuna, stelpurnar versluðu og ég sá um að líta vel út, því engan átti ég aurinn til eyða. Um kvöldið var mér svo boðið í mat til Hödda og Önnu Láru í hamborgarahrygg og vil ég hér með nota tækifærið og þakka fyrir mig. Svo var haldið í rall á barnum fram á rauða nótt.

Skólinn er farinn á fullt og það er gott að fá ástæðu til þess að vakna á morgnanna. Upplýsingar um kúrsana mína má lesa hér . Ég tek fyrstu tvo, en því miður byrjar ekki annar fyrr en í apríl. Býst ekki við að neinn skoði þessa kúrsa nema Pálmar. Svo Pálmar þessi linkur er algerlega tileinkaður þér. Ég vona svo að þér gangi vel að vinna þig út úr sorginni sem þú varst í um daginn. Afsakið þetta innslag, en svo ég haldi áfram þá ég tek með einn kúrs um danskar kvikmyndir með, meira til þess að hafa eitthvað að gera. Svo prófaði ég einn kúrs sem fjallar um íslam en hann er í annarri deild og eitthvað vesen að fá hann metin, en ég ætla að mæta í hann þangað til í apríl.

Ég fékk gefins hillu frá Hallgrími og Ástu sem þau ætluðu ekki með í nýju íbúðina. Hún setur held ég punktinn yfir i-ið í C-104. Fötin sem voru röðuð út um alla íbúð eru nú vel brotin saman í hillunni mér til mikillar ánægju. Í tilefni hillunar var tekið til í C-104 og vil ég meina að þetta sé núna hreinasta íbúðin á þessu kollegi.

Ég og Oddur erum byrjaðir að fara reglulega í ræktina sem er hérna í kolleginu. Þetta eru ekki alveg Laugar en aðstaðan þjónar hlutverki sínu vel. Fínt að fara og að hreyfa sig reglulega aftur, líkaminn batnar einnig með hverjum degi. Svo ég hlakka bara til sumarsins og að geta byrjað að hlaupa úti aftur á fullu.

Þessi pistill var svona langur því ég hafði ekki skrifað lengi. Afsakið það.

Kveðja frá C-104.

Ísland - Danmörk

2007-01-29T12:57:00.000Z

Heil og sæl.

Helgin var fín. Á föstudaginn kom Hildur Gísla til mín og svaf eina nótt áður en hún hélt heim til Íslands. Hún var að klára prófin og seinasti dagur Péturs í Danmörku í nokkrun tíma og því var skemmt sér í nokkru óhófi. Sumir þó meira en aðrir. Öngvu að síður skemmtilegt kvöld.

Laugardagurinn fór mest megnis í leti. Pétur Már kom í heimsókn og enduðum við hjá Hödda og Önnu Láru og horfðum á The Black Dhalia, nýjustu mynd Brian De Palma, útkoman var þó nokkur vonbrigði.

Pétur seldi mér heimasímann sinn og örbylgjuofninn sinn, gegn mjög vægu gjaldi áður en hann fór enda drengur góður. Hans verður saknað. Ég gaf honum loforð áður en hann fór sem á ég þó enn eftir að efna, lesendum síðunnar verður gert viðvart þegar það hefur verið efnt.

Handboltaæði Íslendinga hefur ekki farið fram hjá okkur hér í Danmörku. Horft hefur verið á leikina í gegnum ýmsar leiðir. Það hefur til dæmis verið horft á sjónvarp sem var tengd við tölvu sem var í vefmyndavélasambandi við tölvu heima með vefmyndavélina beint að sjónvarpi (flókinn setning), einnig var keyptur aðgangur að Sputnik en það er fyrirtækið sem á einkaréttinn á sýningu leikjana á netinu hér í Danmörku, því miður eru leikirnir í frekar lélegum gæðum þar. Best var það þegar við áttum leikinn á móti Þýskalandi en þá náði ég leiknum á einni þýskri stöð hérna heima en það þurfti auðvita að vera leikur sem skipti ekki miklu máli. Eins og allir vita þá lentu Íslendingar á móti Dönum í 8 liða úrslitum og verður það rosalegur leikur. Það er jafnvel að maður máli sig í framan fyrir útsendinguna. Ég mun klæðast íslenska landsliðsbúningnum allan daginn (gefandi það að Oddur skili honum) og öskra Áfram Ísland á alla Dani.

Meira var það ekki.

Þromba!

2007-01-22T17:21:00.000Z

Ég hélt að ég yrði duglegri við að blogga á meðan ég var heima, en um leið og ég kom heim fann ég ekki fyrir neinni þörf að blogga. Heima er maður oftast í nógu góðu bandi við sína nánustu og þeir vita hvað er í gangi. Það er til dæmis ástæðan fyrir að ég byrjaði aldrei að blogga fyrr en ég kom út.

En ég er kominn aftur í til Kaupmannahafnar. Mætti í fyrrum höfuðstað Íslendinga þann 14 janúar. Það er mega gott að vera kominn aftur. Það er samt ekki eins og ég hafi haft eitthvað betra að gera en að blogga því ég er enn í fríi þangað til 1. febrúar en þá fer skólinn aftur í gang. Búinn að finna nokkra kúrsa sem mér líst ágætlega á. Hætti í þessum rugl skiptinema kúrsum og fara aftur í einhverja alvöru sagnfræðikúrsa.

Mikilvægt sem er búið að gerast. Ég skal týna eitthvað til: Það var brotist inn í mínu hélgu vé í C-104, en mér sýnist þjófurinn hafa tekið nákvæmlega ekki neitt. Ég sakna einskis. Hélt að hann hefði rænt vefmyndavélinni minni og hélt því fram lengi vel, eða alveg þangað til að ég fór að þurrka af hillunni minni og fann hana á bak við bækurnar mínar, en þá rifjaðist það upp fyrir mér að ég faldi hana þar áður en ég fór heim. Stundum er ég svo sniðugur að ég kem sjálfum mér á óvart. Ég keypti mér síma þegar ég kom hingað aftur, númerið það samt það sama, en hinn síminn var síbatterílaus og leiðinlegur. Pétur Einars er að flytja heim, mér til mikillar gremju, en Guðrún vinkona og fyrrum bekkjarsystir fluttist út, mér til ánægju.

Fyrsti snjódagurinn í Kaupamannahöfn í vetur var í dag. Það er fyndið að sjá fólk hjóla í snjó.

Byrja núna aftur að henda inn reglulega. Svo þangað til næst, veri þið blessuð.

Gleðileg Jól

2006-12-26T20:43:00.000Z

Aðstandandi gunnitobbi.blogspot.com vill óska lesendum sínum gleðilegra jóla og farsældar á komandi ári.

Hafið það gott yfir hátíðarnar.

Heimkoma

2006-12-20T14:04:00.000Z

Einar setningar blogg virðast vera í tísku hjá mér þessa stundina. Best að halda því áfram.

Ritgerð skilað. Klukkutíma fyrir skilafrest. Mjög líkt mér.

Hálfpakkaður og vel sturtaður.

Flugvélin kemur og sækir mig klukkan 22:10

Gamla númerið fer í gang þegar ég lendi, ef einhver þarf að ná mig.

Ég þromba inn einhverju bloggi á meðan ég er heima.

Svo ein mynd í lokin til að hressa uppá þetta. Hún var tekin afmælisdaginn minn á Dr. Spock og sýnir mig og Pétur Má "slamma".

Áttu rjúpu?

2006-12-19T23:53:00.000Z

Ef einhver á rjúpur sem vill gefa mér og öðlast þannig mitt þakklæti (get því miður ekki boðið betur en það) þá má hann endilega hafa samband við mig.

24 tímar í Leifsstöð.

Jólin í ár

2006-12-18T19:57:00.000Z

Topp 5

1. Hitta vini og ættingi (þó meira spenna fyrir því nú í ár en hefur verið undanfarin ár)
2. Jólatívolí
3. Julebryg
4. Low – Just like Christmas
5. Rjúpur

2 dagar í komu.

Læri læri lær!

2006-12-13T19:41:00.000Z

Ég er frekar rólegur þessa dagana. Er að klára 15 bls ritgerð í Nordic Mythology áfanganum sem ég er í. Fjallar ritgerðin um hvort Loki Laufeyjarson hafi verið einn af goðunum eður ei. Það gengur fínt að skrifa, er reyndar að skrifa á ensku og það hefur reynst aðeins erfiðara en ég átti von á. Kom mér svolíið á óvart hvað ég er með lélegan orðaforða miðað við hvað að ég hef alltaf hrósað mér að góðum árangri í ensku.

Jólin eru að nálgast hratt. Þau ná alltaf að læðast aftan að mér. Á eftir að kaupa nokkrar jólagjafir en ætla að ráðast í það um helgina. Hlusta nánast einkum á jólalög þessa dagana við skriftir einungis til þess að auka geðveikina. Anna Lára og Höddi ætla halda upp á Litlu-jólin á laugardaginn og er góð stemming fyrir því. Verður boðið upp á hangikjet og lambalæri svo eitthvað sé nefnt.

Ég býst fastlega við því að fljúga heim þann 20. des. Var búinn að velta nokkrum dögum fyrir mér en þessi virðist henta best. Ekki frá því að það er komin smá spenna í mig að halda heim á leið. Sérstaklega eftir að ég lenti í smá drama í skólanum um daginn sem endaði samt einkar vel í lokinn.

Vill líka hér með óska Pálmari góðs gengis í prófunum. Hann er núna að læra fyrir þessa geðveiki sem kallast Almenn Lögfræði. Ég vona að halda upp heiðri okkar sagnfræðinemi og rústi þessu prófi. Vonandi að hann lesi heldur ekki yfir sig því þá verður ekkert gaman að fá sér einn Julebryg með honum um jólin. Pálmar! Ég sakna þín.

Farinn aftur að læra.

Reiðfákur

2006-12-09T21:21:00.000Z

Ég gleymdi alltaf að segja frá því að ég erfði hjól um daginn. Þetta prýðis Mongoose hjól var áður í eigu Jóns, sem var þjálfari Guðrúnar, en hann er nú fluttur aftur heim. Hjólið hefur komið sér vel og fer ég nú allt sem ég get hjólandi líkt og alvöru Dani. Very nice.

Þökk Þökk

2006-12-09T11:05:00.000Z

Ég vil þakka fyrir allar afmæliskveðjunar sem ég fékk í gær. Sama í hvernig formi þær bárust. Fyrir þá sem gleymdu því þá elska ég ykkur alveg jafn mikið bara aðeins minna.

Hápunktur dagsins var þegar Árni Þór, 4 ára frændi minn, söng afmælissönginn fyrir mig í gegnum síma. Veit ekki hvað er langt síðan að einhver söng fyrir mig afmælissönginn og hvað þá að jafn mikilli innlifun.

Það var haldið smá boð í íbúðinni hans Odds fyrir mig í gær. Þar kom þetta helsta fólk sem ég er með hérna úti. Ég fékk æðislegar gjafir. Ber að nefna blómakörfu, mynd af mér með Basshunter (þrátt fyrir að ég hef aldrei hitt manninn), afmælishatt, geðveika lyklakippu og flottan bol. Eftir festið var haldið á Dr. Spock sem tryllti líðinn á The Rock niðrí bæ. Það var fín upplifun að sjá þá live. Óttar Proppe geislaði af kynþokka. Svo var farið frekar snemma heim, edrú, enda að skrifa á fullu.

Seinna í dag ætla ég njóta afmælisgjöfina sem ég gaf sjálfum mér, leyfi til að horfa á nágrannaslaginn í Manchester borg.

Einn í kotinu

2006-12-04T17:54:00.000Z

Þá eru seinustu gestir mínir flognir heim á leið og þar með lýkur þessu gestabrjálæði sem búið er að vera í nóvember. Ég kveð það bæði með söknuði og fögnuði. Enda búið að vera frekar stíft prógram. Nú er ekki von á neinum gestum fyrir ritgerðaskil. Ekki veitir af enda þarf ég allan tímann sem get í lestur.

Bjarmi, Beta og Hildur héldu snemma af stað í morgunn eftir mjög svo vel heppnaða ferð. Stelpurnar náðu að versla fullt og meira að segja Bjarmi tók sprett í H&M. Enn á ný horfði ég á fólk eyða peningum með öfundsaugum, fann þó eina jólagjöf sem ég ætla sannfæra foreldra mína að kaupa fyrir mig.

Á föstudaginn fórum ég, Bjarmi og Beta í Fields að versla og enduðum mini-golf sem er staðsett í mallinu. Það var ágætis afþreying fyrir utan þá staðreynd að Bjarmi vann og við deildum brautinni með 40 konum á “besta aldri” sem voru í einhverskonar árshátíð. Að mínum dómi voru þær hvorki í ástandi til að keyra né leika mini-golf. Í lokinn voru boltarnir farnir að fljúga full nálægt manni. Í mini golfi nota bene. Kvöldinu var svo eytt í létt sötur niðrá Kollegibar.

Á laugardaginn byrjuðum við á að fara í Carlsberg verksmiðjuna en þeir hafa sett upp túr um verksmiðjuna. Þetta var með skemmtilegri söfnum sem ég hef farið á. Hafa ska það í huga að ég er búinn með safnafræði í Aðferðum II svo ég er með gagnrýnisgleraugun á mér þegar ég fer á söfn. Í minjagripabúðinni var margt sem hugurinn girntist þó ekkert meir en gamlir Carlsberg kassar, sem voru frekar svalir. Aldrei að vita nema að maður fjárfesti í einum slíkum áður en maður heldur heim á leið. Eftir safnið var haldið í Tívoli. Keyptur var túrpassi og gerð árás á tækin. Hildur umbreytist í 4 ára krakka og naut sín í botn, Bjarmi óttast ekkert eftir allar þessar snjósleðaferðir, Betan var mega hress á tækin og Coop vinkona hennar Hildar hló alltaf eins hún ætti lífið að leysa í tækjunum svo félagsskapurinn var ekki að verri endanum. Farið var í öll helstu tækin. Ég sleppti þó að fara í Himmelskibet og fékk nett diss frá öllum. Réttmætilega. Eftir tækin fórum við á Wagamama sem er staður sem Fríða systir kynnti mér fyrir í London og sérhæfir sig núðlum. Hann setti punktinn yfir i-ið á frábærum degi.

Á sunnudaginn var farið á Strikið og seinustu kaupin á eyrinni (eða höfninni) gerð. Síðan var farið á Roberts kaffi til heiðurs Robba í kaffi og kleinur og svo enduðum við Jensens Bøfhus. Rólegur en ótrúlega vel heppnaður dagur.

Eftir að þau fóru snemma í morgunn fór ég að taka til. Rosalega getur þetta litla herbergi mitt orðið skítugt. Réðst ég á öll þrjú litlu herbergin mín og eru þau orðin eins og ný. Íbúðin stækkaði líka margfalt við þessa tiltekt og allt í einu fannst mér ég hafa fullt af plássi. Baðherbergið var þó sínu verst því af einhverri ástæðu fengu allir þrír gestir mínir þá þrá að faðma klósettið mitt, þó af mismunandi ástæðum og mismunandi mikið. Nóg um það, það er allavega orðið hreint.

Ég setti eitthvað myndum inn á myndasíðuna mína. Um að gera skoða þær elskurnar mínar.

Farfuglaheimilið út.

Gamli gestagangurinn

2006-12-01T13:17:00.000Z

Nú eru allir mínir gestir mættir. Bjarmi flaug inn í gær og þá er allt crewið mætt (eða þeir sem gátu mætt). Við vorum búin að taka því rólega fyrir komu hans stelpurnar bara búnar að vera versla og ég búinn að vera í skólanum. Eftir komu Bjarma var allt sett á fullt og kollegibarinn heimsóttur. Afrakstur þess er að við erum öll frekar óver núna, sumir þó verr en aðrir. Sökum plássleysis flúði Hildur til Coop vinkonur sínar svo hún slapp frá öllu þessu rugli. Dagskráin er nokkuð frjáls en fyrir utan að þau ætla versla er planið að kíkja á Carlsberg verksmiðjuna, Tívolí og jafnvel Parken. En hvað rætist úr því kemur bara í ljós.

Ég tók síðan slaka akademíska ákvörðun en góða jólafrís ákvörðun. Sagði mig úr Cross and Cresent: Spain in the middle ages og tók frekar ritgerð í Danish Culture áfanganum. En ég hefði átt að skila 25 bls ritgerð 4. janúar í Spánaraáfanganum sem hefði semi eyðilagt jólafríið mitt. En nú þarf ég bara að skila 8 bls ritgerð um danska menningu fyrir 20. des. Svo þegar gestirnir fara fer allt á fullt í lærdómnum því nú þarf ég að skila tveimur ritgerðum 20. des. En er maður ekki oftast bestur undir pressu? Ég held það nú.

Að lokum smá skilaboð til Tinnu og Robba frá okkur hinum: Tinna og Robbi við söknum ykkar mega! Vildum að þið gætuð verið hérna hjá okkur. En það styttist í jólafrí og Bjarmi er búinn að lofa spilakvöldi í nýja pleisinu sínu svo það er ekki langt bíða eftir hitting. Ef þið hagið ykkur vel er aldrei að vita nema að þið fái símtal frá okkur.

Kveðja frá ruslahauginum sem einu sinni var fallega íbúðin mín.

Fjölskyldan á Selbraut 12 varð fjölskyldan á C-104

2006-11-27T22:23:00.000Z

Helgin er búin að líða fáránlega fljótt. Það er búið að vera æðislegt að hafa fjölskylduna hérna alla hjá sér og var ég búinn að sakna þeirra allra mikið. Eini gallinn var að það var fullt þröngt á þingi hér í C-104.

Fríða náði að bregða mömmu og pabba hressilega þegar hún opnaði hurðina á íbúðinni minni og tók á móti þeim. En þau vissu ekkert að komu hennar. Það voru svo sannarlega fagnaðarfundir. Þegar við vorum ekki að hygge okkur hjá mér vorum við á Strikinu. Mamma og pabbi náðu að versla fullt en ég og Fríða vorum ögn rólegri í tíðinni. Ég náði þó að sníkja nokkra hluti og setja á kreditkortið hjá pabba. Fékk svo afmælisgjöf bæði frá foreldum mínum og Fríðu, settið gaf mér skó og Fríða flotta húfu. Við kíktum í julefrokost á Det Lille Apotek sem er elsti veitingastaðurinn í Kaupmannahöfn og við systkinin skelltum okkur í jólatívolí. Eftir það er ég ekki frá því að ég sé kominn í smá jólaskap sem er hálfgert guðlast hjá mér þar sem venjulega byrja ég ekki að hlakka til fyrr en eftir afmælið mitt. En ég sem reglurnar svo ég hlýt að mega brjóta þær. Fríða flaug svo til London í kvöld og mamma og pabbi fljúga heim á morgunn.

Á laugardagskvöldið gerðist ég frábær gestgjafi og skildi fjölskylduna eftir og fór út á djammið (er samt löglega afsakaður því þau voru öll búin að vera vakandi í næstum heilan sólarhring og því ekki í partýstuði). Því sama kvöld fór fram árshátið IF Guðrúnar. Var það mikil og skrautleg hátíð, svona ein með öllu. Oddur tók heim verðlaunin Bjartasta voninn og er vel að þeim verðlaunum kominn strákurinn, tilykke Oddur minn. Eftir góðan mat og gott session á Pilegarden enduðum ég, Oddur, Kristín, Dagur og Tine á einhvejrum breskum pub þar sem þessi "eini bjór of mikið" var drukkinn. En þetta var hörkustuð og strákarnir í Guðrúnu eru eins og fyrr segir algjörir snillingar.

Kastaði inn myndum á myndasíðuna mína. Þó ekkert of mörgum enda var ég latur á vélinni um helgina.

En gestatörnið er rétt byrja því Hildur og Beta lenda hér á morgun og svo kemur Bjarmi á fimmtudaginn. Ég hlakka til.

Fjölskyldan á C-104 kveður.

Leyndó

2006-11-25T09:22:00.000Z

Psst... ekki segja mömmu og pabba en Fríða systir er líka Köben.

Niðurtalning

2006-11-23T18:34:00.000Z

Sjitturinn, titturinn, mellan og hóran. Afsakið helvítis orðbragðið. Ég er bara svo spenntur að ég get ekki orða bundist. Ég er jafnvel spenntari en drottningin rétt áður að hún kveikir í fyrstu sígarettu dagsins. En þannig er með mál með vexti að nú styttist í heimsóknatörn. Mamma og pabbi mæta á svæðið á laugar- eða sunnudaginn og fara á miðvikudaginn, svo koma Hildur og Beta á þriðjudaginn og að lokum, síðastur en alls ekki sístur, kemur Bjarmi á fimmtudaginn. Þetta verður mega ljúft prógram.

Yfir í ögn í leiðinlegri fréttir. Nárinn er enn í messi (þó ekki Leo). Núna er hann byrjaður að toga í bakið mitt og gefa mér verki þar. Skynsamur maður mundi hætta að elta bolta út um allt og stunda útihlaup. En ég er ekki skynsamur maður. En það er orðið ljóst að ég þarf að reyna að komast í aðra aðgerð til að fá bót á mínum meinum. Ef það er eitthvað verri en nárinn þá er það hárið mitt. Það heldur bara endalaust áfram að vaxa og ég er löngu hættur að ráða við það. Og af einhverri ástæðu, sem er mér gjörsamlega ókunn, þá fara Íslendingar ekki í klippingu í útlöndum. Allir bíða þangað til þeir koma heim og taka klilluna þar. Þetta er einhver óbrjótanlega regla sem ég verð að fylgja. Svo ég er byrjaður að telja niður dagana þangað til ég fer í klippingu í staðinn fyrir telja niður í heimkomu. Þangað til geng ég með húfu.

Annars er ég búinn að vera með átak í eldhúsinu. Ég bauð Pétri Einars í mat í gær og bauð honum upp á kjúklinga faitjas sem var það gott að ég trúði varla að ég hefði gert það sjálfur. Síðan horfðum við á nýjasta Prison Break sem Pétur lifði sig svo mikið inní að hann var byrjaður að berja í mig í endann. Klassa miðvikudagskvöld þar á ferð.

Best að ég fari að læra núna því ég er ekki að fara að gera það í næstu viku og það styttist í ritgerðaskil.

Topp 5

2006-11-19T15:20:00.000Z

…við Danmörku á þessu mómenti

1. Oddur, Kristín, Pétur, Pétur Már, Höddi og Anna Lára
2. Að fá vini og fjölskyldu í heimsókn
3. Amager Khebab
4. IFG Guðrún
5. C-104

jafnt í 6. sæti: verðlagið, veðrið, Skepnan, Tuborg Julebryg, Massimo, samgöngukerfið, Morten og Mike (kennararnir mínir), að geta notað orðið flødeskum í alvöru setningu, pulsubarirnir, H&M og FCK.

Urður, Verðandi og Skuld

2006-11-18T22:38:00.000Z

Urður
• Orri og Gaggi flognir heim. Djöfull var gaman að fá þá í heimsókn!
• Fyrirlestur í Spain in the Middle Ages
• Rall í gær með Oddi, Pétri og Ragga Clausen, sem er í heimsókn í höfuðstaðnum

Verðandi
• Þessi færsla
• Sideways sjónvarpinu
• God´s Gonna Cut You Down með Johnny Cash í eyrunum
• Fikt í nýju myndaalbúmi enda er Fotki búinn að vera fokka mér upp

Skuld
• 25 bls ritgerð um El Cid í Spain in the Middle Ages
• 15 bls ritgerð um óákveðið efni í Nordic Mythology
• Kasta inn myndum af íbúðinni
• Hildur og Beta 28. nóv
• Bjarmi 30. nóv
• Heimferð á milli 21-23. des

Then there were two…

2006-11-12T17:57:00.000Z

Jájá, Garðar er floginn heim og erum við Orri tveir eftir í C-104. En Orri flýgur heim á miðvikudaginn.

Dagskráin sem ég var búinn að plana fyrir strákana heppnaðist svona líka vel. Ég var búinn að kasta inn en myndum af Parken og eins og sést skemmtum við okkur ótrúlega vel. Við kíktum á Strikið, Fields og Fisketorvet. Strákarnir versluðu eitthvað, en fátæki námsmaðurinn gaf ókeypis tískuráð og lóðsaði túristana um borgina. Á fimmtudaginn tók félagi okkar Borat á móti okkur í Paldas bíóinu við Axeltorv og hélt okkur hlæjandi í 90 mínútur.

Á laugardagskvöldið var farið á kollegibarinn. Endaði það þannig að þar voru mættir hvorki fleiri né færri níu fyrverandi Valhýsingar. Þar voru Ég, Gaggi, Orri, Oddur, Pétur, Pétur Már, Stebbi Reykjalín, Dagur og Dabbi Halldór, en Stebbi var í heimsókn hjá þeim tveim síðast nefndum. Afleiðing þessa hittings var frekar slæm þynnka. Var þá ákveðið að sleppa heimsókn til orsaka þynnkunnar s.s. Carlsberg verksmiðjuna. Í staðinn var gengið yfir til hippa nágranna minna í Christaníu. En þar var ég að leika japanskan túrista og mynda allt í kringum mig. Smelli af einni mynd og þá gengur einn vígalegur félagi að mér og spyr hvort hann fái ekki að sjá myndina. Svo ég góðfúslega sýni honum hana. Þegar hann komst að því að ég hafði ekki verið að mynda hann þá sagði hann mér að það væri stranglega bannað að taka myndir af fólki í Christaníu og bað mig um að láta vélina niður. Náði félaginn að hræða mig svo mikið að ég tók ekki fleiri myndir þann daginn.

Eftir átök síðustu dag ákváðum ég og Orri að eyða deginum í dag í að taka það rólega og horfa á enska boltann. Reyndar voru Höddi og Anna Lára voru svo elskuleg að bjóða okkur í pönnsur svo við fórum við yfir og slátruðum myndarlegum bunka af pönnsum. Síðan er planið að fara til Malmö á morgunn og tjekka á þeim sænsku.

Ég fékk gott símtal frá Bjarma félaga í gær. En þannig er mál með vexti Hildur og Beta bekkjarsystur úr Kvennó ætla að kíkja til mín fyrstu helgina í des og var Bjarmi að spurja hvort hann væri ekki velkomin með. Ég hélt nú það, enda rauðhærðir alltaf velkomnir á mitt heimili. Svo nú er maður byrjaður að telja niður dagana í næstu heimsókn og þessi ekki einu sinni búinn. Þetta er ljúft líf.

Meira var það ekki að sinni. Hej hej.

Ragnheiði Elínu í 4 sæti!

2006-11-10T09:29:00.000Z

Eins og ég var búinn að koma inná áður er prófkjör Sjálfstæðismanna í SV-kjördæmi á morgunn.

Meðal þeirra sem eru að bjóða sig fram er stórfrænka mín, hún Ragnheiður Elín. En fyrir þá sem vita það ekki þá er hún systir mömmu, svo hún er með góð gen. En það er ekki allt því stelpan er einnig þrælmenntuð. Hún er stúdent úr Kvennó, eftir það lá leiðin í stjórnmálafræði við Háskóla Íslands og svo í masterinn í Georgtown University. Undanfarin níu ár hefur hún verið aðstoðarmaður Geirs H. Haarde forsetisráðherra og fylgt honum á milli ráðuneyta. Þannig að hún ætti að vera búin að gera sér grein fyrir hvað það er að vera þingmaður. Með þessa reynslu á bakinu ákvað hún að bjóða sig fram í prófkjörið. Ef þið viljið vita meira kíkið þá inn á ragnheidurelin.is.

Ég hef alltaf litið mikið upp til Röggu frænku. Hún er klár, góð, ákveðin og vel menntuð og það eru kostir sem einkenna góðan þingmann. Hún hefur alltaf verið til staðar fyrir mig og reynst mér vel, meðal annars með því að fara yfir ótal ritgerðir. Hún studdi mig í því að fara í Kvennó og í skiptinám og það eru ákvarðanir sem ég sé ekki eftir. Ég hvet því alla til að setja Ragnheiði Elínu í 4. sæti

Svona á seðillinn að líta út.

Super FCK

2006-11-09T15:47:00.000Z

Vi er, Vi er, Vi er, Vi er Super FCK!

Loksins styðjum við félagarnir sama lið!

Myndir frá leiknum á myndasíðunni.

P.S. Leikurinn endaði 3-1 fyrir FCK

Bakkabræður sameinaðir

2006-11-07T13:52:00.000Z

Ég vil byrja á því að gefa massa shout out til Pabba. Um helgina hljóp hann eitt stykki maraþon í New York og lauk því á 4:22:03, sem er flottur tími. Ég hef verið að monta mig af mínu hálf maraþoni sem ég hljóp í sumar, fer þá bara ekki kallinn og gerir helmingi betur, meira en helmingri eldri. Mér finnst hann vera að senda mér skýr skilboð að hann sé helmingi betri en ég og er lítið annað gera í stöðunni en að samþykkja það. Ég vonandi næ að jafna kallinn einhvern tímann

Á föstudaginn kom Tuborg Julebryg út hér í Danmörku. Allir bjórdrykkjumenn þekkja þennan drykk enda einstaklega góður löður sem er einungis seldur í kringum jólin. Það er alltaf rosa hátíð um allt Danaveldi þegar hann kemur út og það má ekki byrja að selja hann fyrr en 20:59, fyrsta föstudag í nóvember. Crewið fór niður í bæ og kíkti á stemminguna. Myndir af atburðum má nálgast á myndasíðunni hans Odds en vélin mína ákvað að vera batterílaus eftir fyrstu mynd kvöldsins. Ég ákvað þó að henda einni mynd inn hér.

Ég er þarna búinn að dæma árganginn og svipurinn segir allt um það hversu góður hann er.

Í gær lentu svo Gaggi og Orri í Kaupmannhöfn. Ég er búinn að bíða lengi eftir þessari heimsókn og það var alveg frábært að sjá strákana. Þeir verða hérna hjá mér í um það bil viku. Er planið að kíkja á FCK-Elfsborg á Parken á morgunn, fara í heimsókn í Carlsberg verksmiðjuna, fara í biffen og sjá Borat, kíkja á Strikið, Fields og Fisketorvet og Bakkabræðrast eitthvað. Það voru ekki liðnir 5 tímar frá því þeir lentu að PES6 var kominn í gang heima. Það segir eitthvað um hversu eðlileg þessi heimsókn verður.

Aftur að námsbókunum. Seinna.

15 mínútur af frægð

2006-11-03T14:43:00.000Z

Í fyrsta Danish Culture tímanum mínum var verið að fræða okkur um bókmenntaarf Dana. Kennarinn fræddi 150 námsþyrsta nemendur um víkingana á Íslandi sem skrifuðu niður sögur sínar og trúabrögð. Hann nauðgar íslenskri tungu með að telja upp verk Snorra Sturlusonar (þó ekki íþróttafréttamannsins), Eddukvæðin og Íslendingasögurnar með hræðilegum dönskum hreim. Með hjálp nútímatækni blastar hann einu Eddukvæði upp á töflu. Síðan snýr hann sér að bekknum sposkur á svip og spyr eftir Íslending í hópnum. Ég lít vandræðilega í kringum mig í von um að sjá einhverjar hendur á lofti. Miðað við fjölda Íslendinga sem stunda nám í Kaupmannahöfn býst ég allavega við að sjá nokkrar hendur fara á loft en ekkert gerist. Að lokum rétti ég mína upp. Spyr kennarinn þá hvort ég vilji ekki heiðra bekkinn með því að lesa upp ljóðið, það væri bara ekki það sama ef hann mundi flytja það. Ég virði fyrir mig ljóðið sem lítur illskiljanlega út og meikar ekki mikið sens í fljótu bragði. Með 300 augu á þér og pressu frá kennaranum er frekar erfitt að segja bara pent nei og setjast niður. Svo ég tók eina sekúndu í að undirbúa mig og fer svo með ljóðið. Eftir flutinginn mátti heyra saumnál detta í salnum. Ég lít í kringum mig og þá annað hvort starir fólk á mig eða bendir, ef ekki bæði. Síðan brjótast út þessi líka fagnaðarlæti sem eiga bara heima eftir ótrúleg væmið atriði í lélegri Hollywood mynd. Svo hélt tíminn áfram.

En ég á eftir að muna eftir þessu ótrúlega fyndna og súrrelíska mómenti í nokkurn tíma. Og nú þegar ég kynni mig fyrir einhverjum sem er með mér í þessum tíma og segist vera frá Íslandi er alltaf spurt hvort ég sé gaurinn sem fór með ljóðið, og svo er ég beðinn um að segja eitthvað á íslensku.

Þessi smásaga úr mínu lífi er í boði föstudagsins 3. nóvembers. Góða helgi.

Fréttir, atburðir, árás og kosningaslagur

2006-11-01T17:46:00.000Z

Þrátt fyrir loforð í seinustu færslu verð ég að spara sleggjuna þangað til seinna. Því af mér er mest lítið að frétta. Náði mér í kvef um helgina og er búinn að vera veikur heima síðan. Þessar námsferðir fóru illa með mig. Það var samt gaman í þeim báðum og ég tók smá af myndum sem verður hent inn við tækifæri.

Það er samt ekki furða að maður sé að verða veikur hérna. Í nótt var stormur og í dag byrjaði að snjóa, fyrir utan að það er orðið skítkalt úti. Stormurinn í nótt fór illa með hjólin og ruslatunnurnar sem lágu út um allt en þó sérstaklega með tréið í bakgarðinum.

FCK – Man.Utd. í kvöld, MTV hátíðin á morgunn, Tuborg Julebryg kemur út á föstudaginn og annar stórleikur FCK – Brondby á sunnudaginn. Allt að gerast hér í Kaupmannahöfn. Reyndar er ég ekki með miða á neinn af þessum atburðum en jólabjórinn er gefins fyrsta klukkutíman svo ég fæ allavega bjór.

Ég fór út að hlaupa um daginn sem er ekki frásögu færandi nema að ég náði því merka afreki að hlaupa á umferðaskilti. Það er orðið frekar dimmt hérna úti og það voru bara ljósastaurar hinu megin götunnar svo ég sá ekki mikið og allt í einu réðst bara skiltið á mig! Mér stórbrá en meiddi mig sem betur fer ekki mikið. En engu að síður var þetta mega fyndið og ég þakka fyrir að enginn hafi séð þetta.

Að lokum vil ég lýsa yfir stuðningi mínum við Ragnheiði Elínu sem sækist eftir 4. sæti á lista Sjálfstæðisflokksins á Kraganum, nánar tiltekið Suðvestur kjördæmi, sem er einmitt kjördæmi Seltirninga. Ég hvet alla til að kíkja inn á ragnheidurelin.is og kíkja baráttumál hennar.

Jæja, ég er farinn að horfa á FCK – Man.Utd í sjónvarpinu, sem er bara alveg eins og að vera vellinum sjálfum. Já…

Later

Nýjasta nýtt

2006-10-27T14:56:00.000Z

Vikan er búin að vera fljót að líða. Fór loks í tíma á miðvikudaginn eftir gott vetrarfrí. Byrjaði á að mæta ólesinn því ég hafði misskilt hvað kennarinn setti fyrir. Góður árangur það.

Tók léttan Texas Hold´em með nokkrum Íslendingum í gær. Gekk nú ekkert allt of vel. Ljóst er að ég þarf að fara að spila þetta aðeins oftar en á hálfs árs fresti ef ég ætla einhvern tímann að taka pottinn heim.

Helgin er að verða fullbókuð. Er boðin í afmæli hjá Önnu Láru í kvöld það verður eitthvað bíó. Á laugardaginn þarf ég að vera mættur klukkan 10 fyrir framan skólann minn. Ástæðan er námsferð til Svíþjóðar. Verður farið til Ales Stena í Suður-Svíþjóð. Verður þetta í fyrsta skipti sem ég heimsæki Svíþjóð og er ég vel spenntur fyrir því. Þar sem ég þekki einungis steríotýpu af Svíum býst ég við því að þeir verði allir ljóshærðir og vel gelaðir. Þessi námsferð er á vegum Nordic Mythology kúrsins. Þá er sagan þó einungis hálfnuð vegna þess á sunnudaginn fer ég í aðra námsferð. Er stefnan sett á Frederiksborgarkastala þar sem kastalinn verður skoðaður bak og fyrir. Þessi námsferð er á vegum Danish Culture kúrsins. Hver námsferð tekur minnst 6 klukkutíma og ég þarf að koma með nesti með mér. Á milli þessa námsferða verð ég að gera 20 mínúta fyrirlestur fyrir Spain in the Middle Ages sem ég á að flytja á miðvikudaginn. Æðislegt það.

Síðan mín er víst eitthvað búin að vera að haga sér illa nýlega. Ég fór eitthvað að fikta í kóðanum í tilraun til þess að pimpa aðeins upp á hana og það tókst líka svona vel. Ég vona þó að hún sé komin í lag núna.

Kem með einhverja sleggju eftir helgi en þangað til eigið góða helgi.

Uppgjör helgarinnar

2006-10-23T19:04:00.000Z

Ég vil byrja á því að þakka fyrir góðar móttökur við minni fyrstu færslu.

En nóg um það, helgin sem leið var frekar ljúf. Vetrarfrí í skólanum og rólegheit. Föstudagurinn byrjaði á léttu spilakvöldi hjá Oddi og Kristínu en endaði í algjöru rugli niðrí Kollegibar. Það á það til að gerast.

Á laugardaginn var svo strákakvöld í C-104 ( sem er íbúðin mín). Gestir mínir voru þeir Oddur Helgi og Hörður Ingi. Hörður bauð uppá lambakjöt, sem var líka svona rosa gott. Eins og spekingurinn orðaði það: Mynd segir meira en þúsund orð.

Endaði kvöldið með léttri bæjarferð, sem er í engan stað minnisstæð. Strákurinn ekki alveg í stuði og ekki enn kominn með prófgráðu í dönsku skemmtanlífi og skemmtistöðum. En ég skal vera búinn að vinna mína heimavinnu áður en ég fer næst niður í bæ.

Sunnudagurinn fór í fótboltagláp. Ég er nýbúinn að fjárfesta í myndlykli sem gefur mér aðgang að ensku deildinni og meistaradeildinni, mér og nokkrum öðrum íbúum Oresundskollegisins til mikillar ánægju. Íbúðin fylltist af fótboltaáhugamönnum sem fylgdust spenntir með stórleik dagsins í ensku úrvalsdeildinni þ.e. viðreign Manchester United og Liverpool. Eftir leikinn fóru nú flestir heim en veislan var bara rétt að byrja hjá mér. Horfði á Reading – Arsenal, Inter – Udinese og svo loks Real Madrid – Barccelona. Augun orðin létt ferköntuðu í lok dagsins.

Í vikunni byrjar skólinn aftur á fullu. Þarf að byrja á fyrirlestri um El Cid sem var riddari á Spáni á sínum tíma. Svo þarf að lesa nokkrar blaðsíður í hinum fögunum en þetta á ekki að vera neitt sem ég ræð ekki við.

Í lokinni er rétt að minnast á það að ég er búinn að stofna myndasíðu eins og allir aðrir sem byrja með bloggsíðu, enda er ég hrikalega frumlegur. Ég bý til tengil hérna á hliðinni þar sem hægt verður að nálgast myndirnar.

En þangað til næst, verið þið sæl.

Bloggiti Blogg

2006-10-19T20:48:00.000Z

Já, ég held það nú. Fyrsta bloggið loksins staðreynd. Ég var búinn að lofa því að halda uppi bloggi á meðan ég væri úti Danmörku og þetta er (aum) tilraun til þess að efna það loforð.

Það er kannski rétt að ég byrji á stuttum útdrætti um dvöl mín hérna hingað til. Þetta blogg er kannski full langt vegna þess að margt hefur gerst á þessum tíma.

Byrjum á byrjuninni. Ég lenti í Kaupmannahöfn þann 29. ágúst. Þar sem ég átti ekki að fá íbúðina mína 15. september sem síðar breyttist í 20. var ég húsnæðislaus í byrjun. Fyrstu 3 vikurnar dvaldi ég á heimili þeirra Odds og Kristínar og á ég þeim mikið að þakka fyrir þann greiða. Þau eru alveg æðisleg.

Ég skrapp í heimsókn til Odense til hennar Hildar Gísla. En Óðinsvéj eins og bærinn heitir á íslensku og þýðir í raun hin helgu véj Óðins, en þetta bæjarnafn er eitt að fáum sem er kennt við Óðin sem þó er talinn hafa verið æðstur hinna gömlu heiðna guða. Hefur þetta löngum verið smá hausverkur þeirra sem hafa rannsakað hinn gömlu skandinavísku trúarbrögð. Smá útúrsnúningur, en áfram með smjörið. Ég var þar eina helgi og skemmti mér vel og fór meðal annars í danskt afmæli hjá bekkjarbróður Hildar og skoðaði bæjarlífið í Odense. Enduðum við seinna kvöldið á harðasta þema skemmtistað sem ég hef komið á. En þemað var strandpartý og á þessum stað var til dæmis alvöru sandur, stórt fiskabúr, sæti hönnuð sem strákofar og hálfur hraðbátur var út á miðju gólfi en hraðbáturinn þjónaði þeim tilgangi að vera aðstaða plötusnúðarins.

Stebbi Orri kom í heimsókn til mín í eina viku september, nánar tiltekið frá 18-25. En ég fékk einmitt íbúðina afhenta þann 20. Það var mjög gaman hjá okkur vinunum. Við versluðum, borðuðum góðan mat, fífluðumst, drukkum og nutum íbúðarinnar. Foreldrar hans Stebba voru á sama tíma stödd hér í Köben og buðu okkur út að borða með sér. Vil ég hér með þakka fyrir það boð. Hann skrapp í heimsókn til Hildar Gísla á fimmtudeginum og tók hana svo með til höfuðstaðarins. Þar skemmtum við okkur þrjú um helgina. Stebbi kom með það markmið að versla hérna úti. En við vöknuðum upp við illan draum á mánudeginum, brottfaradag hans, þegar hann var ekki búinn að versla eitt né neitt. En það góða við vera strákur er það að maður getur bara hoppað niður í bæ og klárað svona smámuni á tveimur tímum sem og við gerðum. Stebbi fór held ég bara sáttur heim.

Eiríka móðursystir mín og Dói maðurinn hennar stöldruðu einnig við eina helgi í Kaupmannahöfn í september mánuði. Þau voru það góð að bjóða mér út að borða og nutum við góðrar kvöldstundar við kóngsins Nýtorg og borðuðum flottan mat.

Síðasti gesturinn til að heimsækja mig á þessum tíma mínum hér úti var hann pabbi. Áttum við feðgar góða helgi. Hápunktur var maturinn á laugardagskvöldið en hann var geggjaður. Pabbi kom nefnilega með íslenskt lambalæri sem við elduðum og borðuðum heima hjá Hallgrími og Ástu, en Hallgrímur er sonur Arngríms og Önnu sem eru vinahjón mömmu og pabba.

Svo er ég líka búinn að vera að hanga með Pétri Má úr Gróttunni. En sumir þekkja hann kannski betur sem litla bróður Siggu af nesinu. Hann er hérna í skóla og æfa með Brondby. Hann er búinn að kíkja nokkrum sinnum í heimsókn og taka gott tjill hérna. Einnig hef ég verið hanga með Pétri Einars. Hafa þeir Pésar stytt mér stundirnar hérna úti.

Oddur plataði mig í að ganga í fótboltafélag hérna úti sem er skipað íslenskum strákum. Liðið heitir FC Guðrún og spilar í utandeildinni hérna úti. Ég var ekkert búinn að spila í 6 mánuði áður en ég kom út svo fótboltaformið var ekki upp á það besta. Auk þess að getan hefur minnkað mikið sökum meiðslanna. Ég var samt búinn að gleyma hversu rosalega gaman mér finnst að spila fótbolta. Strákarnir í liðinu eru líka algjörir snillingar. Ég er búinn að spila um það bil 6 leiki með liðinu og þeir hafa farið á alla vegu. Eina slæma við fótboltann er að fóturinn minn er aftur kominn í algjört hönk og býst ég ekki við að spila lokaleik tímabilins.

Ég fór í Tívolíið með Oddi og Kristínu og vinapari þeirra sem ég er búinn að kynnast hérna úti Hödda og Önnu Láru. Ég fæ oftast að fljóta með þeim. Er þá fimmta hjól eða bara litla barnið. En tívolíferðin var alger snilld og prófaði ég meðal annars Himmelbjerget sem er nýjast tæki þeirra Dana og það eina sem ég átti eftir að prófa. En maður er hífður upp í 80 metra í litlum stólum og svo snúið í hringi. Alveg ágætis tæki. Svo var Tívolíferðin fullkomnuð með heimsókn í fallturninn sem hræðir mann alltaf jafn vel.

Skólinn er nú kominn á fullt en hann var frekar lengi í gang. Ég er í þremur kúrsum: Einn heitir Danish Culture og fjallar um, eins og nafnið gefur til kynna, danska menningu og er kúrs sem boðinn er upp á fyrir skiptinema. Annar heitir Nordisk Mythology og er um gömlu heiðnu trúarbrögðin. Sá þriðji heitir Between Cross and Crescent: Spain the Middle Ages og fjallar um innrás Múslima á Íberíuskagann 711 og hvernig þeir misstu hann aftur 500 árum seinna. Allt áhugaverðir kúrsir. Þeir eru þó einungis kenndir einu sinni í viku og þar af eru tveir á sama degi sem þýðir að ég sé í tvo daga á viku í skólanum sem er frekar lítið og óvenjulegt, ég er samt ekkert að kvarta.

Nú er flest það mikilvægasta sem búið er að gerast hérna úti komið fram. Ég þakka þeim sem komust í gegnum allan þennan texta og lofa þeim að ég skal byrja skrifa reglulega núna svo þetta verði ekki bara eintómar ritgerðir hjá mér.

Ég vil enda þetta blogg, sem markar upphafsskref mín í þessum bloggheimi, með að tileinka það Robba sem hefur ávallt kvatt mig til að byrja að blogga, Tinnu fyrir áskorunina, Hildi Sigurðar fyrir þolinmæðina og svo auðvita öllum sem lesa þetta. Einnig bið ég Orra vin minn afsökunar fyrir að hafa byrjað að blogga, ég veit hversu mikið hann hatar þetta fyrirbæri en ég mun aldrei neyða hann til að lesa þetta.

Einnig vil ég biðja þá sem lesa þetta að kommenta svo ég get séð hverjir eru að lesa þetta.

Kveðja frá Kaupmannahöfn